Փաշինյանը Ռուսաստանն ու Հայաստանը եղբայրական երկրներ է անվանել

Ռուսաստանի նախագահ Վլադիմիր Պուտինը ՀՀ վարչապետ Նիկոլ Փաշինյանի հետ հանդիպման ժամանակ ասել է, որ ուրախ է նրա հետ զրուցելու հնարավորության համար, քանի որ կուտակվել են քննարկվելիք բազմաթիվ հարցեր՝ թե՛ երկկողմ, թե՛ տարածաշրջանային, և հույս է հայտնել, որ ՇՀԿ գագաթնաժողովի շրջանակներում իրենց զրույցը օգտակար և բովանդակալից կլինի։

«Շատ ուրախ եմ Ձեզ տեսնելու և այսօրվա ու վաղվա միջոցառումների շրջանակներում զրուցելու հնարավորության համար։ Վաղուց չենք տեսնվել, կուտակվել են բազմաթիվ տարբեր հարցեր՝ երկկողմ, տարածաշրջանային, միջազգային։ Հուսով եմ, որ այսօրվա մեր հանդիպումը Ձեզ հետ... օգտակար և բովանդակալից կլինի։ Ուրախ եմ Ձեզ տեսնել», - ասել է Պուտինը՝ Փաշինյանին։

Նիկոլ Փաշինյանն իր հերթին նշել է, որ գոհ է Ռուսաստանի և Հայաստանի միջև գոյություն ունեցող գործընկերությունից ու երկխոսությունից և երկու երկրներն անվանել է եղբայրական։

«Մենք միշտ շատ խիտ օրակարգ ունենք։ Վստահ եմ՝ այսօրվանն էլ, դա ակնհայտ է։ Ես շատ գոհ եմ մեր միջև ձևավորված գործընկերությունից և երկխոսությունից... մեր անձնական երկխոսությունից և, իհարկե, մեր եղբայրական երկրների միջև շատ ակտիվ երկխոսությունից», - հանդիպման ժամանակ ասել է Փաշինյանը։