Հնդկաստանը վրեժ է լուծում Ադրբեջանից․ Ալիևը՝ Պակիստանի վարչապետին

Ադրբեջանի կողմից Պակիստանին ցուցաբերվող աջակցությանը ի պատասխան՝ Հնդկաստանը փորձում է վրեժ լուծել Ադրբեջանից միջազգային կազմակերպություններում, հայտարարել է Ադրբեջանի նախագահ Իլհամ Ալիևը Չինաստանում Պակիստանի վարչապետ Մուհամմադ Շահբազ Շարիֆի հետ հանդիպման ժամանակ։

Ալիևն ասել է, որ ադրբեջանա-պակիստանյան հարաբերությունները հիմնված են եղբայրության վրա և շնորհավորանքներ է հղել Պակիստանին «Հնդկաստանի նկատմամբ տարած հաղթանակի» կապակցությամբ։

Ալիևի խոսքով՝ Հնդկաստանը փորձում է վրեժ լուծել Ադրբեջանից միջազգային ֆորումներում, բայց դա «իրենց համար նշանակություն չունի», քանի որ «եղբայրական հարաբերությունները ամեն ինչից վեր են»։

Շարիֆը, ինչպես հաղորդում են ադրբեջանական լրատվամիջոցները, «գոհունակությամբ հիշել է Ադրբեջան կատարած իր այցելությունները» և նշել Լաչինում Ադրբեջան-Թուրքիա-Պակիստան ձևաչափով եռակողմ հանդիպման կարևորությունը։ Ալիևը ընդգծել է, որ քայլեր են ձեռնարկվում այս ձևաչափով ձեռք բերված պայմանավորվածությունները կյանքի կոչելու ուղղությամբ։

Շարիֆը նաև շնորհավորել է Ալիևին Ադրբեջանի և Հայաստանի միջև հարաբերությունների կարգավորման ու խաղաղության օրակարգի առաջխաղացման գործընթացում հաջողությունների համար՝ այս իրադարձությունը անվանելով պատմական։

Նշենք, որ լրատվամիջոցների հաղորդմամբ՝ Հնդկաստանը կրկին արգելափակել է Ադրբեջանի՝ ՇՀԿ-ին միանալու հայտը։