Գաղտնի բանակցություններ չկան․ Երուսաղեմի հայոց պատրիարքություն

Հայ առաքելական եկեղեցու Երուսաղեմի պատրիարքարանը հերքել է «Կովերի պարտեզի» շուրջ նոր գաղտնի գործարքի մասին տեղեկությունները։

«Գործընթացն ընթանում է սահմանված ընթացակարգին համապատասխան։ Համայնքի ներկայացուցիչները երկու անգամ մասնակցել են բանակցություններին, և կարգավորման սկզբունքները մանրամասն ներկայացվել են համայնքի ներկայացուցիչների փաստաբաններին»,–ասվում է պատրիարքարանի սոցիալական ցանցերում տարածած հայտարարության մեջ: 

Պատրիարքարանից վստահեցրել են՝ գաղտնի բանակցություններ չկան․

«Հաշտության սկզբունքները մանրամասն ներկայացվել են համայնքի ներկայացուցիչների փաստաբաններին՝ թե՛ միջնորդի, թե՛ պատրիարքարանի փաստաբանների կողմից»:

Ավելի վաղ Երուսաղեմի 6 հայկական կազմակերպություններն ահազանգել էին, որ «Կովերի պարտեզի» շուրջ նոր գաղտնի գործարք է կնքվել։

Այն կնքվել է Հայ առաքելական եկեղեցու Երուսաղեմի պատրիարք Նուրհան Մանուկյանի և իսրայելական «Xana Gardens» ընկերության միջև՝ առանց համայնքի հաստատման։ Գործարքը վտանգավոր է, քանի որ այն պարունակում է առաջին փաստաթղթի հայցերը հետ կանչելու պահանջ։ Պատրիարքարանը հույս ուներ աննկատ ստորագրել պատմական հայկական այգիների փոխանցման վերաբերյալ փաստաթուղթը՝ հակասելով համայնքի շահերին։ Սա, ըստ էության, հաստատում է գործարքի իսկզբնե անօրինական լինելը։ 6 հայկական կազմակերպությունները հայտարարության մեջ կոչ են անում չվավերացնել համաձայնագիրը, հրապարակել դրա բոլոր կետերը և համագործակցել համայնքի հետ, որի ապագան վտանգված է։