Բրազիլացի գործարարը Նեյմարին կտակել է ավելի քան 1 միլիարդ դոլար․ ԶԼՄ

Բրազիլացի անանուն գործարարը իր ողջ ունեցվածքը կտակել է ֆուտբոլիստ Նեյմարին: Ըստ լրատվամիջոցների տեղեկությունների՝ ակտիվների մեջ են մտնում անշարժ գույք, ներդրումներ և ընկերության բաժնետոմսեր, որոնց արժեքը գերազանցում է 1 միլիարդ դոլարը:

The Sun-ի փոխանցմամբ՝ Ռիու Գրանդի դու Սուլ նահանգից անանուն գործարարը պաշտոնապես Նեյմարին նշանակել է իր կարողության միակ ժառանգորդ: 

Ժառանգության ճշգրիտ չափը չի հրապարակվել: Աղբյուրի տվյալներով՝ այն ներառում է բազմաթիվ ակտիվներ, այդ թվում՝ անշարժ գույք, ներդրումներ և խոշոր ընկերությունների բաժնետոմսեր, որոնք գնահատվում են 6.1 միլիարդ ռեալ (ավելի քան 1 միլիարդ դոլար՝ ներկայիս փոխարժեքով - Forbes Sport):

Նշվում է, որ տղամարդը անձամբ չի ճանաչում Նեյմարին և նրա հետ ընտանեկան կապեր չունի: Իր կտակում գործարարը նշել է, որ չի ենթարկվել որևէ հարկադրանքի կամ խրախուսանքի, և որ որոշումը կայացվել է բացառապես խաղացողի նկատմամբ իր հիացմունքի պատճառով: Տղամարդու խոսքով՝ ինքը Նեյմարի մեջ տեսնում է հոգեհարազատ անձնավորություն և նրան համարում է անձնուրաց մարդ։

Կտակն այժմ վերանայվում է բրազիլական դատարանում՝ դրա օրինականությունը հաստատելու և Նեյմարին պաշտոնապես որպես ժառանգորդ ճանաչելու համար։ Ֆուտբոլիստի ներկայացուցիչները նշել են, որ իրենք այս կտակի մասին պաշտոնական ծանուցում չեն ստացել։ Նեյմարն ինքը դեռևս որևէ մեկնաբանություն չի տվել այս թեմայի վերաբերյալ։