Ոստիկանության բոլոր ծառայողները կկարողանան սթափության վիճակի ստուգում իրականացնել

Հայաստանում հանցագործությունները և վարչական իրավախախտումները կանխելիս և բացահայտելիս, ինչպես նաև հասարակական կարգը պահպանելիս ոստիկանության բոլոր ծառայողներին սթափության վիճակի ստուգում իրականացնելու իրավասություն է տրվում:

«Արմենպրես»-ի փոխանցմամբ՝ Ոստիկանության բարեվարքության եւ կարգապահական կանոնագիրք և կից ներկայացված օրենքների նախագծերի փաթեթն ԱԺ նիստում ներկայացրեց ՆԳ փոխնախարար Արմեն Մկրտչյանը: Փաթեթով առաջարկվում է ոստիկանության և փրկարար ծառայողների համար հստակեցնել կարգապահական տույժերն ու խրախուսանքները, ապահովել միասնական մոտեցում Քաղաքացիական ծառայության մասին օրենքի դրույթները տարածելով նշված ծառայությունների վրա:

«Հանցագործությունները և վարչական իրավախախտումները կանխելիս և բացահայտելիս, ինչպես նաև հասարակական կարգը պահպանելիս ոստիկանության բոլոր ծառայողներին վերապահել իրավասություն՝ իրականացնելու սթափության վիճակի ստուգում: Ներկայումս այդ իրավասությունը վերապահված է միայն պարեկային ծառայողներին, և մյուս ծառայողները դիմում են պարեկների աջակցությանը»,–ասաց փոխնախարարը:

Նրա խոսքով՝ առաջարկվում է ոստիկանությունում և փրկարար ծառայությունում ծառայության գրավչությունը բարձրացնելու նպատակով նախատեսել կարգավորումներ, որոնց համաձայն ատեստավորման արդյունքներով տրվող հավելավճարներին զուգահեռ ոստիկանության և փրկարար ծառայողները կստանան օրենքով նախատեսված լրավճարներ և հավելումներ:

Առաջարկվում է նաև Ոստիկանության և Փրկարար ծառայության պաշտոն զբաղեցնող ծառայողների սոցիալական երաշխիքների ապահովման համատեքստում նախատեսել կարգավորում, որի համաձայն՝ նշված ծառայողները համապատասխան մարմնի կամ կազմակերպության վերակազմակերպման կամ կառուցվածքային փոփոխության արդյունքում ծառայությունից ազատվելուց հետո՝ 6 ամսվա ընթացքում, ոստիկանության կամ փրկարար ծառայության պաշտոնում նշանակվելու դեպքում կպահպանեն զբաղեցրած վերջին պաշտոնի համար նախատեսված աշխատավարձը, եթե այն բարձր է տվյալ պաշտոնի համար սահմանված աշխատավարձից:

Առաջարկվում է նախ նախարարության կառուցվածքային ստորաբաժանումներում կամ գրասենյակում քաղաքացիական ծառայության պաշտոնի նշանակվելու գրավչությունը բարձրացնելու նպատակով նախատեսել կարգավորում, որի համաձայն՝ ոստիկանության կամ փրկարար ծառայության պաշտոն զբաղեցնող ծառայողները, ծառայությունից ազատվելուց հետո՝ 6 ամսվա ընթացքում, ներքին գործերի նախարարության կառուցվածքային ստորաբաժանումներում կամ գրասենյակում քաղաքացիական ծառայության պաշտոնի նշանակվելու դեպքում կպահպանեն զբաղեցրած վերջին պաշտոնի համար նախատեսված աշխատավարձը, եթե այն բարձր է քաղաքացիական ծառայության տվյալ պաշտոնի համար սահմանված հիմնական աշխատավարձից: Ընդ որում, պաշտոնի փոփոխության դեպքում աշխատավարձը չի պահպանվի: