Ալիևի կոշիկների լիզելն իրենց համար լուրջ դիվանագիտություն է․ Իշխան Սաղաթելյան

Ամբողջ խնդիրը նրանում է, որ երբ ասում ենք՝ շարունակ զիջելով խաղաղության չես հասնի, ժողովո՛ւրդ ջան, սրա բերածը խաղաղություն չէ, սրանք մեզ մեղադրում են, թե տեսեք՝ «գալիս են պատերազմի ուժերը, մենք ուզում ենք բերենք խաղաղություն, նրանք սպառնալիք են խաղաղության համար»։ Մենք չենք սպառնում Հայաստանի խաղաղությանն ու ինքնիշխանությանը, սպառնում են՝ թշնամիները և Հայաստանի օրվա իշխանությունները։ Այս մասին լրագրողների հետ զրույցում ասել է ԱԺ «Հայաստան» խմբակցության պատգամավոր Իշխան Սաղաթելյանը։

«Լսե՞լ եք, որ սրանք վերջին 5 տարվա մեջ մի թթու բառ ասեն էն պետություններին ու պետությունների ղեկավարներին, որոնք ծաղրում են իրենց։ Ալիևի կոշիկների լիզելը կարող է իրենց համար լուրջ դիվանագիտություն է։ Ամեն անգամ, երբ հանդիպում են Ալիևին, Էրդողանին, լիզում են կոշիկները, խոնարհվում են, գալիս են այստեղ և ավելի մեծ առոգանությամբ և տոնով սկսում հոխորտալ ընդդիմության վրա,– ասել է նա՝ հավելելով, դա «պարզ հանձնարարություն է»։

Պատգամավորի կարծիքով՝ ռազմական բյուջեի չավելացումն ու պարտադիր զինվորական ծառայության ժամկետի կրճատումը բխում են Ադրբեջանի պահանջներից և արվում են Բաքվի թելադրանքով․ «Նրանք հետևողականորեն շարունակում են կատարել թշնամու պահանջները և այս հրադադարը ներկայացնում են իբրև խաղաղություն»,– ասել է Սաղաթելյանը։