Լեռը մուկ է ծնել, որոշել են խորհրդարանական լսումներ անել. Կոնջորյան

Ընդդիմությունն այսքան երկար-երկար, քանի տարի ասում է՝ հեսա փոխում ենք իշխանությունները, մինչև տոներ, մինչև մայիսյան տոներ այլևս իշխանություն չի լինելու, այլևս իշխանություն չկա, իրավիճակին չեք տիրապետում, ժողովրդի վստահությունը չունեք, տարին մի 4 անգամ «իշխանափոխություն են անում», ժողովրդին «փրկում են», մի խոսքով՝ քանի տարի է՝ չեն կարողանում մի բան անել և երկար մտածելուց հետո հասկացել են՝ լեռը մուկ է ծնել, որոշել են խորհրդարանական լսումներ անել: Ես ապշած եմ: Այդ մասին Ազգային ժողովի՝ սեպտեմբերի 11-ի նիստին ասաց «Քաղաքացիական պայմանագիր» խմբակցության ղեկավար Հայկ Կոնջորյանը՝ արձագանքելով «Հայաստան» խմբակցության ղեկավար Հայկ Մամիջանյանի հայտարարությանը:

Մամիջանյանը, նշենք, ասել էր, որ «Պատիվ ունեմ» խմբակցությունը սեպտեմբերի վերջին կկազմակերպի խորհրդարանական լսումներ, որի նպատակն է խորհրդարանական և արտախորհրդարանական ուժերի համախմբումը:

«Դրա փոխարեն կարելի էր ուղղակի գալ նիստերի դահլիճ, նիստերին մասնակցել, Կառավարության հետ հարցուպատասխանի ժամանակ վարչապետին հարց տալ: Այդ ժամանակ ավելի շատ դիտումներ կունենայիք, այդ ժամանակ ավելի շատ մարդ կլսեր ձեր բովանդակությունը»,- ասաց Կոնջորյանը։