Զախարովան քննադատել է Լեհաստանի՝ Բելառուսի հետ սահմանը փակելու որոշումը

ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Լեհաստանի իշխանությունները սահմանը փակելով՝ զրկել են սեփական քաղաքացիներին ազատ տեղաշարժվելու իրավունքից։ Դիվանագետը ընդգծել է, որ Բելառուս այցի ժամանակ նկատել է լեհական մեքենաների մեծ թիվ և քաղաքացիների ազատ մուտքը երկիր՝ առանց որևէ խոչընդոտի։

Զախարովայի խոսքով՝ Լեհաստանի քաղաքացիները, այցելելով Բելառուս՝ հանգստի կամ գնումների համար, սեփական աչքերով համոզվել են, որ իրականությունը տարբերվում է լեհական մեդիայի ներկայացրած պատկերից։ «Լեհական իշխանությունները, կորցնելով համեմատությունը իրենց «ժողովրդավարության» և Բելառուսի մասին պատմվող «արյունալի տոտալիտարիզմի» միջև, փակեցին սահմանը սեփական քաղաքացիների համար։ Ահա ձեզ «լիբերալիզմ»», — գրել է նա։

Լեհաստանի վարչապետ Դոնալդ Տուսկը սեպտեմբերի 9-ին հայտնել էր Բելառուսի հետ սահմանը փակելու որոշման մասին՝ պատճառաբանելով այն Ռուսաստանի և Բելառուսի համատեղ «Արևմուտք-2025» զորավարժություններով։