Պատմության ընթացքում եղել են իրավիճակներ, երբ որ վրաերթի ենք ենթարկվել․ կարո՞ղ է դա նրանից է, որ մայրուղու երթևեկելի հատվածում ենք կանգնած․ Փաշինյան

Խաղաղության մասին փաստաթղթեր ունենք ստորագրված։ Այնպես չէ, որ միայն ես եմ խոսում խաղաղության մասին, Ադրբեջանն էլ է (խոսում – խմբ․)։ Ըստ էության, խաղաղության մասով տարընթերցում և տարբերություն մեկնաբանությունների մեջ չկա։ Այս մասին լրագրողների հետ զրույցում ասաց Նիկոլ Փաշինյանը։

«Մեր իրականության մեջ հետևյալ դիտանկյունից է ամեն ինչ դրվում՝ Ադրբեջանն էս ասեց, մյուսն էն ասեց, երրորդն էն ասեց, չորրորդն էն ասեց ․․․ և գործնականում միշտ տեսադաշտից դուրս է թողնվում, թե մենք ինչ ենք ասում։ Դա նրանից է, որ մենք երկար տարիներ խոսել ենք Հայաստանի սուբյեկտացման մասին, որ Հայաստանը ոչ թե միջազգաին հարաբերությունների սուբյեկտ է, այլ՝ օբյեկտ։ Դա նրանից է, որ մեզ երբեք չի հետաքրքրել, թե մենք ինչ ենք ասում, այլ հետաքրքրել է, թե ուրիշներն ինչ են ասում։ Հիմա ո՞րն է փոփոխությունը։ Մեզ համար ամենակարևորն էն է, թե մենք ինչ ենք ասում, ինչ դիրքորոշում ունենք, և ինչքանով ենք այն համապատասխանեցնում միջազգային երթևեկությանը և երթևեկության կանոններին»,– ասաց վարչապետը։

Նա վստահեցրեց, որ Հայաստանը ոչ մեկի պահանջն էլ չի կատարում․ «Մեր պատմության ընթացքում եղել են իրավիճակներ, երբ որ մենք վրաերթի ենք ենթարկվել, և դրա արդյունքում ասում ենք՝ մարդկային արդարություն, անարդար աշխարհ, մենք թքենք քո ճակատին, բայց մեր շուրջը չենք նայում, կարո՞ղ է դա նրանից է, որ մենք մայրուղու երթևեկելի հատվածում ենք կանգնած։  Եվ էն որ ասում ենք՝ ժողովուրդ, ոչ թե մեզ ծանոթ մեթոդով ու որտեղից պատահի անցնենք փողոցը, այլ պետք է անցնենք հետիոտնային անցումով։ Դա կարող է մեկնաբանվի, որ դիմացի վարորդը կամ ուրիշ վարորդները սպառնացին մեզ և մենք այնքան թուլամորթ գտնվեցինք, որ լույսի տակ կանգնեցինք»։