ՀՀ երեք նախագահները սուտ մատնություն են կատարել Հայաստանի դեմ՝ մեղադրելով պատերազմ սկսելու մեջ. Կոնջորյան

«Քաղաքացիական պայմանագիր» խմբակցության անունից ելույթում խմբակցության ղեկավար Հայկ Կոնջորյանն արձագանքեց ընդդիմության գործընկերների որոշ ելույթների:

Դիմելով ընդդիմադիր պատգամավոր Արծվիկ Մինասյանին, նա ասաց՝ շատ ցցուն է դրսևորումը, որ նրանք հստակորեն տորպեդահարում են խաղաղության գործընթացը, քանի որ հնարավոր չէ չնկատել այն փոփոխությունները, որոնք տեղի են ունենում և ունեցել վերջին տարիներին:

«Երբ մենք ձեզ ասում ենք՝ դուք դրական օրակարգերի թշնամին եք, և ասում ենք, որ դուք Հայաստանում ցանկացած դրական օրակարգ փորձում եք նսեմացնել, նեղանում եք, բայց իրականում այդպես է, ժողովո՛ւրդ»,- ասաց Կոնջորյանը՝ ընդդիմությանը մեղադրելով «խաղաղություն» բառից այսահարվելու համար:

«Հենց խաղաղություն բառը ասում ես, միանգամից ցնցումների մեջ են ընկնում: Նույնիսկ արդեն առանց ներքին դիսկոմֆորտի եք Հայաստանում սկսում մեղադրել պատերազմ հրահրելու մեջ»,- հայտարարեց նա:

Նրա խոսքով՝ ՀՀ երեք նախագահները՝ Լևոն Տեր-Պետրոսյան, Սերժ Սարգսյան և Ռոբերտ Քոչարյան, սուտ մատնություն են կատարել ՀՀ-ի դեմ՝ երեքն էլ մեղադրելով ՀՀ-ին պատերազմ սկսելու մեջ: