Ուկրաինացիները Դանիայում սկսեցին օգնել Եվրոպային «դրոնների պատի» ստեղծման գործում. Զելենսկի

Ուկրաինայի զինվորականները արդեն Դանիայում են և սկսել են աջակցել Եվրոպային՝ «դրոնների պատ» կառուցելու գործում՝ կիսվելով հարվածային անօդաչուների հայտնաբերման և ոչնչացման փորձով։ Այս մասին Վլադիմիր Զելենսկին գրել է իր Telegram ալիքում։

«Մեր տղաները արդեն Դանիայում են։ Նրանք փորձառու ուկրաինացիներ են, ովքեր գիտեն, թե ինչպես հայտնաբերել և խոցել հարվածային դրոնները։ Նրանք արդեն սկսել են իրենց առաքելությունը, և մենք պատրաստ ենք կիսվել այդ փորձով։ Սա միայն սկիզբն է՝ առաջին քայլը դեպի արդյունավետ "դրոնների պատի" ստեղծում՝ ամբողջ Եվրոպայի պաշտպանության համար», — նշել է նա։

Զելենսկին նաև հորդորել է նոր երկրներին միանալ PURL նախաձեռնությանը և շտապ ընդունել 19-րդ հակառուսական պատժամիջոցների փաթեթը։ Ավելի վաղ Ֆինլանդիայի վարչապետ Պետտերի Օրպոն հայտարարել էր, որ ԵՄ-ն հրաժարվել է ֆինանսավորել այսպես կոչված «դրոնների պատը» եվրոպական բյուջեից՝ իսկ որոշ երկրներ դեռ չեն աջակցում ծրագրին։