Թիվ 117 դպրոցի մի քանի աշակերտ որոշել են դասից փախչել, պահակը չի թողել, 2–րդ հարկի պատուհանից թռել են, մեկի կողոսկրը կոտրվել է. Տնօրեն

Երևանի Կոնստան Զարյանի անվան թիվ 117 հիմնական դպրոցի 9–րդ դասարանի աշակերտները որևէ կոնֆլիկտ չեն ունեցել որևէ ուսուցչի հետ, և տարածված տեղեկությունը սուտ է. news.am-ի հետ զրույցում ասել է դպրոցի տնօրեն Թերեզա Ավագյանը։

«Ընդամենը մի քանիսը որոշել են դասից փախչել, մի քանի տղա և երկու աղջիկ, պահակը թույլ չի տվել փախչեն, բարձրացել են 2-րդ հարկ և թռել են դպրոցի 2–րդ հարկի պատուհանից, մնացած 20 աշակերտները շարունակել են իրենց դասապրոցեսը»,-ասել է տնօրենը։

 Ըստ նրա՝ երեխաները գնացել են շրջել Քանաքեռում, հետո միայն ժամը 18.00-ին նոր ծնողները երեխային տարել են հիվանդանոց։ «Պարզվել է կողոսկրը ջարդվել է, երեխայի կյանքին վտանգ չի սպառնում, ամեն ինչ նորմալ է»,-ասել է տնօրենը։

Հիշեցնենք, որ ավելի վաղ ֆոտոլրագրող Գագիկ Շամշյանը հայտնել էր, որ 2-րդ հարկի պատուհանից նետված և վնասվածք ստացած աղջկան Սուրբ Աստվածամայր բժշկական կենտրոնում անհրաժեշտ հետազոտություն են անցկացրել, որից հետո երեխան տեղափոխվել է հիվանդասենյակ և նշված բժշկական կենտրոնի բուժանձնակազմի շնորհիվ հնարավոր է եղել շատ արագ հետազոտությունների արդյունքում գտնել ողնաշարի հատվածի վնասված մասը, ու հիմա դեռ մեկ շաբաթ ևս 14-ամյա աղջիկը մնալու է հիվանդանոցում, ստանալու է անհրաժեշտ բուժումներ, որից հետո կատարվելու է վիրահատություն։

Ֆոտոլրագրողի տեղեկություններով՝ դեպքի մասին ծնողները տեղեկացրել են ոստիկանության Քանաքեռ-Զեյթունի բաժին։