ԵՄ-ն նախատեսում է մինչև 50% բարձրացնել պողպատի ներմուծման մաքսատուրքը

Bloomberg-ի տեղեկություններով՝ Եվրոպական միությունը պատրաստում է նախագիծ, ըստ որի՝ պողպատի ներմուծման մաքսատուրքը կարող է բարձրացվել մինչև 50 տոկոս։ Այս քայլը նպատակ ունի ԵՄ-ի մաքսային դրույքաչափերը համահունչ դարձնել ԱՄՆ-ի քաղաքականությանը և պայքարել Չինաստանից ու այլ ասիական երկրներից եկող էժան մետաղի ավելցուկային ներհոսքի դեմ։

Ներկայում ԵՄ-ում գործում է ժամանակավոր պաշտպանական մեխանիզմ, որը սահմանում է 25% մաքսատուրք ներմուծվող պողպատի մեծ մասի համար՝ սահմանված քվոտան սպառվելուց հետո։ Վերջին տարիներին եվրոպական մետալուրգիան ճնշման տակ է՝ մրցելով էժան ներմուծման հետ։

Եվրոպական Պողպատի Ասոցիացիան (Eurofer) պահանջում է խստացնել սահմանափակումները։ Tata Steel Europe-ի տնօրեն Հենրիկ Ադամը զգուշացրել է, որ եթե չսահմանվեն լուրջ պատնեշներ ցածր ինքնարժեքով պողպատի ներմուծման համար, ապա Եվրոպայում դժվար կլինի արտադրել ավտոմեքենաներ, բեռնատարներ, մարտկոցներ ու քամու տուրբիններ տեղական պողպատով։