Աշխարհի ավտոարտադրողները խուճապի մեջ են

Ավտոարդյունաբերության խոշորագույն ընկերությունները շտապում են ապահովել հազվագյուտ մետաղների պահուստներ, քանի որ նոյեմբերի 8-ից Չինաստանը մտադիր է խստացնել դրանց արտահանումը։ Գործարարներն ահազանգում են, որ սահմանափակումները կարող են հանգեցնել մասերի պակասի և գործարանների դադարեցման, հայտնում է Reuters-ը։

Չինաստանն այսօր վերահսկում է համաշխարհային հազվագյուտ մետաղների արդյունահանման շուրջ 70 տոկոսը, վերամշակման՝ 85 տոկոսը, իսկ համաձուլվածքների և մագնիսների արտադրության՝ մոտ 90 տոկոսը։ Նոր սահմանափակումների ցուցակում ընդգրկված են նյութեր, ինչպիսիք են իտերբիումը, հոլմիումը և եվրոպիումը, որոնք օգտագործվում են ոչ միայն էլեկտրաշարժիչների, այլև մեքենաների զգայուն համակարգերի արտադրությունում։ Ընկերությունները փորձում են հումք ձեռք բերել այլ երկրներից, սակայն, ինչպես նշում է գերմանական NMD ընկերության ղեկավար Նադին Ռայները, «հարմար ռեսուրսներ կան, բայց ոչ՝ վերամշակման ենթակառուցվածք»։

Չնայած ԱՄՆ-ն և Ավստրալիան պայմանագիր են ստորագրել հազվագյուտ մետաղների հանքերի համատեղ զարգացման վերաբերյալ, փորձագետները զգուշացնում են, որ չինական գների քաղաքականությունը շարունակում է խաթարել արտասահմանյան նախագծերը։ Ավտոարտադրողները, այդ թվում՝ Toyota, BMW, Renault, General Motors և ZF, արդեն մշակում են առանց հազվագյուտ մետաղների շարժիչներ, սակայն դրանց լայն արտադրությունը դեռ տարիներ կտևի։ Մինչ այդ Չինաստանի ազդեցությունը մնում է վճռորոշ․ ինչպես նշում է Tradium-ի վերլուծաբան Յան Գիզեն՝ «սա արտահանման վերահսկման վերջը չէ, այլ դրա սկիզբը»։