«Սերժի բանդա, ձենդ կտրի՛, աղջիկ ջան»․ թեժ բանավեճ՝ ՔՊ-ականների ու Աննա Մկրտչյանի միջև

Այս իշխանություններն ասում են՝ մտածեք և համակերպվեք, շնորհակալ լինելով, որ օրինակ, եթե նիկոլական բանդան ձեզ հայհոյեց, որովհետեւ դրա փոխարեն կարող էին, օրինակ, ծեծել կամ խոշտանգել։ Այս մասին, այսօր՝ հոկտեմբերի 21–ին, ԱԺ հայտարարությունների ժամին իր ելույթում նշեց «Պատիվ ունեմ» խմբակցության պատգամավոր Աննա Մկրտչյանը։

Նա շարունակեց. «Շնորհակալ եղեք, եթե ձեզ ծեծի են ենթարկել կամ խոշտանգել են, որովհետեւ նիկոլական բանդան կարող էր որոշել ձեր նկատմամբ կարել քրեական գործ, սարքեն ահաբեկչություն։ Այդ դեպքում էլ շնորհակալ եղեք, հարգելի քաղաքացիներ, որովհետեւ գործ կարելու փոխարեն նիկոլական բանդան կարող է հրահանգ ստանար ձեզ սպանելու»։

Նիստը վարող ԱԺ փոխխոսնակ Ռուբեն Ռուբինյանն ընդհատեց ելույթը՝ ասելով. «Ձեզ նախազգուշացում եմ հայտարարում»։

Ընդդիմադիր պատգամավորը շարունակեց. «Այ սա նիկոլական բանդայի շարունակությունն է, որը դուք տեսնում եք, որ անգամ խոսքի նկատմամբ պրիմիտիվ հարգանք չունեն»։

Այս խոսքերից հետո Ռուբինյանը հրահանգեց անջատել Աննա Մկրտչյանի խոսափողը։

«Ի դեպ, ողջունենք տիկին Մկրտչյանի տիրոջը՝ Սերժին և իր բանդային։ Ձեռքով անենք սերժական բանդային։ Ձենդ»,– հավելեց ԱԺ փոխխոսնակը։

Դրանից հետո ԱԺ դահլիճում բանավեճ սկսվել Աննա Մկրտչյանի եւ ՔՊ–ական պատգամավորների միջեւ։ Տեղից ինչ–որ բան էր բղավում ՔՊ–ական պատգամավոր Հրաչյա Հակոբյանը. «լեզուները շաղ են տալիս»,–ասաց նա։

Ռուբեն Ռուբինյանը երկար ժամանակ հորդորում էր երկու կողմերին լռել, ի վերջո դիմեց Աննա Մկրտչյանին. «Մի հատ ձենդ կտրի, աղջիկ ջան»,–ասաց նա, ապա ընդմիջում հայտարարեց։

Ընդմիջումից հետո Ռուբեն Ռուբինյանը տեղեկացրեց, որ «Պատիվ ունեմ» խմբակցությունը լքեց դահլիճը. «Եվ դա լավ է։ Սերժական բանդան ինչքան քիչ լինի այս դահլիճում, այնքան լավ։ Բոլոր կաշառակերները պետք է նստեն բերդում և փտեն բերդում, և ամբողջ ապօրինի ձեռք բերված գույքը պետք է վերադարձվի պետական բյուջե։ Տիկին Մկրտչյանին էլ կասեմ՝ թող գնա իր տիրոջը՝ Սերժին հարցնի, թե իրան ինչ են կրթել տարբեր տեղերում»։