Ուկրաինան պատերազմում արդեն պարտվել է. չեխ գեներալ

Չեխաստանի ռազմական հետախուզության նախկին ղեկավար, գեներալ Անդոր Շանդորը հայտարարել է, որ Արևմուտքը չի ցանկանում ընդունել Ուկրաինայի պարտությունը, թեև ճակատում իրավիճակը դրա հստակ վկայությունն է։ Նրա խոսքերն է փոխանցում Parlamentní listy պարբերականը։

Շանդորի խոսքով՝ Ուկրաինայի նախագահ Վլադիմիր Զելենսկին և արևմտաեվրոպական առաջնորդները «չեն ցանկանում տեսնել իրականությունը»։ «Նրանք հսկայական ջանքեր գործադրեցին Կիևին օգնելու համար, բայց այժմ պարզապես չեն կարող ընդունել տխուր ավարտը։ Ուկրաինան այլևս չունի բավարար զորքեր, որպեսզի փոխի իրավիճակը», — ընդգծել է գեներալը։

Նա հավելել է, որ ստեղծված պայմաններում Կիևը չի կարող հասնել հաղթանակի։ Ավելի վաղ The Financial Times-ը հաղորդել էր, որ եվրոպական երկրները նախատեսում են վերանայել Ուկրաինայի աջակցության իրենց ռազմավարությունը՝ այն համաժամեցնելով Վաշինգտոնում նախատեսվող Թրամփ-Զելենսկի բանակցությունների արդյունքների հետ։