Բոլոր ժամանակներում Քրիստոսի հետևորդներին հալածել են անհավատները, արծաթասեր ու դավաճան իշխանավորները․ Տեր Եզրաս

Ռուսաստանի և Նոր Նախիջևանի թեմի առաջնորդ Տեր Եզրաս արք. Ներսիսյանը խոսում է թեմում Եկեղեցու ձեռքբերումների մասին և արձագանքում Հայաստանում հոգևորականների թիրախավորմանը:

-Սրբազան հայր,  ինչ նպատակով էիք օրեր առաջ Դոնի Ռոստով մեկնել:

-Դոնի Ռոստովը հին հայկական գաղթօջախ է: Քաղաքը, որտեղ ապրում են մեծաթիվ հայեր, հայկական դիմագիծ ունի: Այստեղ գործում է հայկական հին ու նոր յոթ եկեղեցի, հայորդյաց տներ, երիտասարդական միություններ, հայկական թանգարաններ: Այցի ընթացքում հանդիպում ունեցա պատվարժան հայերի հետ, քննարկեցինք մի շարք կազմակերպչական, այդ թվում՝ վերջերս ՌԴ իշխանությունների կողմից թեմին հոգևոր կրթական հաստատության պատմական շենքի վերադարձի և հետագա գործածության հարցը: Թեմապատկան շենքի վերադարձը, անշուշտ, նշանակալի և կարևոր ձեռքբերում է հայ Եկեղեցու համար և մենք բարձր ենք գնահատում ՌԴ իշխանությունների բարյացակամ վերաբերմունքը թեմի գործունեության ինչպես հոգևոր և եկեղեցաշինական, այնպես էլ կրթական և սոցիալական ոլորտներում:

– Շենքն ի՞նչ նպատակի համար է ծառայելու։

-Մեզ տրամադրված շենքի շուրջ 4 հազար քմ տարածքը նախևառաջ կարոտ է նորոգության: Որոշ աշխատանքներից հետո այն կծառայի Դոնի Ռոստովի հայերի կրթադատիարակչական կարիքներին: Աներկբա ճշմարտություն է, որ հայրենիքից դուրս բոլոր ժամանակներում մեր ազգի ինքնության, միասնակության, հարատևության ու կրթական գործի միակ երաշխավորը եղել է և կլինի առաքելահաստատ մեր Սուրբ Եկեղեցին, ուստի ուրախ ենք և մխիթարված, որ այսօր այս գիտակցումով ռուսաստանաբնակ հայերը կառուցում են եկեղեցիներ և դպրոցներ: Եթե նախկինում թեմում գործում էր ութ եկեղեցի, ապա վերջին քսան տարվա ընթացքում մեզ հաջողվել է աղոթատների թիվը հասցնել ութսունի, որոնց կից  կառուցվել են կիրակնօրյա դպրոցներ, ստեղծվել եկեղեցասեր երիտասարդաց միություններ: Ի մասնավորի կուզեմ առանձնացնել Մոսկվայի եկեղեցու հովանու ներքո  գործող Սբ․ Գրիգոր Նարեկացու անվան եզակի միջնակարգ կրթօջախը, հայորդյաց տունը՝ 600  աշակերտով և Սանկտ Պետերբուրգի նորաբաց հոգևոր ճեմարանը։ Ասեմ նաև, որ անմիջապես եկեղեցական համալիրի տարածքում է գործում հարուստ մշակութային ցուցանմուշներով բացառիկ «Տապան» թանգարանը, որը Ռուսաստանի թանգարանների միության պատվավոր անդամ է:

-Սրբազան հայր, մամուլում քննադատության թիրախում երբեմն հայտնվում եք նաև դուք, որտեղ Ձեզ դատապարտում են ինչ-որ մութ արարքների մեջ: Այս ամենին, սակայն, պատասխան չի տրվում, ինչու:

-Անիմաստ եմ համարել արձագանքել, քանի որ բոլոր ժամանակներում, սկսած մեր Տեր Հիսուս Քրիստոսի երկրային կյանքից մինչև մեր օրերը, Քրիստոսի հետևորդներին հալածել, թիրախավորել, վարկաբեկել են անհավատները, չարամիտները, արծաթասեր ու դավաճան իշխանավորները: Պատմությունը վկայում է, թե ինչ հալածանքների են ենթարկվել մեր հայրերից շատերը՝ Սբ. Գրիգոր Լուսավորիչը, Սբ. Ներսես Մեծը, Սբ. Գրիգոր Նարեկացին, Մաղաքիա արք. Օրմանյանը, Խրիմյան Հայրիկը, Խորեն Մուրադբեկյան կաթողիկոսը, ներկայիս Վեհափառ Հայրապետը, մեր սրբազան հայրերը, ազգային բարերար Սամվել Կարապետյանը, բազում նվիրյալներ, ինչպես նաև համաքրիստոնեական սուրբ  Հովհան Ոսկեբերանը, ով ասել է. «Հեռու մնացեք չարալեզու մարդկանցից, ինչպես թունավոր իժերից, որովհետև նրանք նման են այն կոյաբզեզներին, որոնց ապրելու համար անհրաժեշտ է թրիքը»: Ահա թե ինչու չեմ կարևորել պատասխանելը, քանզի նրանց նպատակն է լոկ վարկաբեկել, իսկ ես նախընտրում եմ գործ անել, գործն է իմ պատասխանը, այլապես որն է լինելու մեր տարբերությունը, եթե ես չարին չարով պատասխանեմ՝ իմանալով, որ «Սատանան սուտ է» (Հովհ. 8:44), իսկ «Աստված՝ ճշմարիտ» (Հովհ. 3:33)։