Կրթության ոլորտի պետական ծախսերը կազմելու են ՀՆԱ-ի շուրջ 3 տոկոսը․ ԿԳՄՍ նախարար

2026 թվականի պետական բյուջեով կրթության, գիտության, մշակույթի, սպորտի և երիտասարդության ոլորտներում նախատեսված է իրականացնել 200-ից ավելի միջոցառում։ Այս մասին հայտարարել է ԿԳՄՍ նախարար Ժաննա Անդրեասյանը ԱԺ-ում բյուջեի քննարկման ժամանակ։

«Հաջորդ տարվա բյուջեով մեր ոլորտներին նախատեսված պետական հատկացումները էական աճ են գրանցում։ 2026 թվականի բյուջեով նախատեսված է կրթության, գիտության, մշակույթի, սպորտի և երիտասարդության ոլորտներում իրականացնել 200-ից ավելի միջոցառում։ Ընդհանուր առմամբ՝ շուրջ 420 միլիարդ դրամի չափով, ինչը կազմում է 2026 թվականի պետական բյուջեի հատկացումների 11.6 տոկոսը։ 2025 թվականի համեմատ՝ շուրջ 16 տոկոս աճ ունենք»,– ասել է Անդրեասյանը։

Նրա խոսքով՝ ծախսերի 85 տոկոսը կրթության ոլորտին է ուղղվում՝ 356 միլիարդ դրամ, ինչը նշանակում է, որ կրթության ոլորտի պետական ծախսերը կազմելու են ՀՆԱ-ի շուրջ 3 տոկոսը։

«2021 թվականին մեր ցուցանիշը 2.3 տոկոս էր, և կարող ենք տեսնել, որ կառավարության գործունեության ընթացքում էապես աճել են կրթության ոլորտի ծախսերը։ Այս իրողությունը արձանագրում ենք մի իրավիճակում, երբ ամբողջ աշխարհում, նույնիսկ զարգացած երկրներում, կրթության ոլորտին հատկացվող պետական բյուջեն նվազում է։ Չափազանցություն չի լինի ասել, որ անկախության շրջանում որևէ կառավարություն այս ոլորտում այնքան ներդրում չի արել, որքան արվում է այս կառավարության օրոք։ Բյուջեի շուրջ 38 տոկոսը կազմում են կապիտալ ծախսերը՝ 168.7 միլիարդ դրամ։ 2021-ի համեմատ դրանք աճել են 1168 տոկոսով, իսկ 2025-ի համեմատ՝ 34.8 տոկոսով»,– նշել է նա։