Այնքան էլ հաշտ չենք այդ որոշման հետ. ՀՌՀ նախագահը՝ «Շողակաթ»-ը փակելու մասին

«Նախագծի հեղինակը շատ լավ գիտի, որ ոչ միայն ես, այլև մեր հանձնաժողովի անդամները այնքան էլ հաշտ չենք այդ որոշման հետ և գտնում ենք, որ կարելի էր շատ ավելի արդյունավետ ու ճիշտ լուծում գտնել»,- ասել է Հեռուստատեսության ու ռադիոյի հանձնաժողովի նախագահ Տիգրան Հակոբյանը՝ անդրադառնալով ԱԺ ընդունած օրինագծին, համաձայն որի՝ «Շողակաթ» հեռուստաընկերությունը փակվելու է։

Ըստ Հակոբյանի՝ 2020թ. ընդունված նոր օրենքի համաձայն՝ «Շողակաթ»-ը ոչ թե հոգևոր-մշակութային հեռուստաալիք պետք է լիներ, այլ՝ կրթամշակութային։

«Հոգևոր-կրոնական հաղորդումներ կրթամշակութային ալիքում չպետք է լինեն, որովհետև կրթությունը և մշակույթը կրոնի, կղերական մոտեցումների հետ կապ չպետք է ունենա։ Հասարակությունը, բոլորս դրա վրա ուշադրություն չդարձրինք, չձևափոխվեց նաև «Շողակաթ» հեռուստաընկերությունը»,- նշել է նա՝ հավելելով․ «Եթե «Շողակաթ»-ը կատարեր իր առաքելությունն ու օրենսդրական պարտավորությունները, սրան չէինք հասնի»։

Նրա խոսքով՝ «Շողակաթի» վարկանիշը վերջերս գրեթե զրոյի էր հասել, և լսարան չուներ։