«Զանգեզուրի միջանցքը» ավելի լայն հասկացություն է, այն չունի բացասական նրբերանգ․ ադրբեջանցի փորձագետ

Ադրբեջանի դիրքորոշումը մնում է նույնը՝ ունենալ անխոչընդոտ և արագընթաց անցում: Այս մասին լրագրողներին ասել է Երևանում անցկացվող «Օրբելի» կենտրոնի կազմակերպած ֆորումին մասնակից ադրբեջանցի փորձագետ Ռուսիֆ Հուսեինովը՝ պատասխանելով այն հարցին, թե ինչու Է Բաքուն պնդել, որ խաղաղության համաձայնագրում լինի «անխոչընդոտ» ձևակերպումը:

«Եվ կարևոր է, որ այստեղ շահութաբաժին քաղի Նախիջևանի բնակչությունը, որոնք տուժել են գրեթե 4 տասնամյակ տևած հակամարտության հետևանքով: Նրանք էլ արժանի են տեսնելու երկու երկրների միջև խաղաղության շահութաբաժինները»,- նշել է նա:

 Հուսեինովի պնդմամբ՝ «Ադրբեջանում ահռելի համայնք կա էթնիկ ադրբեջանցիների, որոնք կամ իրենց նախնիներն ապրել են Հայաստանում և մի քանի ալիքներով դուրս են եկել, հատկապես 20-րդ դարում և վերաբնակվել են Ադրբեջանում և Ադրբեջանից դուրս»։ 

«Նրանք ենթաէթնիկ խումբ են, ունեն իրենց ծեսերը, պարերը և իրենք ահռելի քաղաքական ու տնտեսական ներուժ ունեն Ադրբեջանում, ուստի արհամարհել այդ համայնքի գոյությունը սխալ կլիներ։ 

Իմ կարծիքով՝ ժողովուրդների միջև կոնտակտների ընթացքում մենք պետք է փորձենք այդ համայնքի անդամներին ներգրավել , սերտ համագործակցության մեջ հայերի հետ, որպեսզի ի վերջո որոշակի հաղորդակցություն ձևավորվի, 3-4 տասնամյակ յուրաքանչյուր հասարակություն ապրել է իր փուչիկի մեջ։ Մենք կարող ենք կռվել, վիճել, բայց պետք է դասեր քաղենք՝ լսելու միմյանց դիրքորոշումը։ Այդ հաղորդակցությունը միանշանակ կօգնի մեզ փոխըմբռնման գործում»,– ասել է նա։

Երևանում գտնվող մյուս ադրբեջանցի փորձագետ Զաուր Շիրիևն էլ ասել է՝ «Զանգեզուրի միջանցքը» ավելի լայն հասկացություն է, և դա չի վերաբերում TRIPP-ին:

«Ի տարբերություն Հայաստանի, այն չունի բացասական նրբերանգ։ Երբ մենք ասում ենք միջանցք եզրույթը,  Հայաստանում այլ կերպ են ընկալում, Ադրբեջանում՝ այլ»,– նշել է նա։