ՄԻՊ աշխատակազմի ներկայացուցիչը մասնակցել է ազգային փոքրամասնությունների կրթական խնդիրներին նվիրված աշխատաժողովին

Մարդու իրավունքների պաշտպանի օգնական Կլարա Հովհաննիսյանը մարտի 31-ին մասնակցել է «Քայլ դեպի փոփոխություն․ համակարգային լուծումներ կրթության և մասնակցության համար» խորագրով երկօրյա աշխատանքային քննարկմանը։ Այն անցկացվել է Ռյա Թազա բնակավայրում՝ ՀՀ Ազգային ժողովի, «Կոնրադ Ադենաուեր հիմնադրամի» «Քաղաքական երկխոսություն Հարավային Կովկաս» տարածաշրջանային ծրագրի երևանյան գրասենյակի և «Շամս» մարդասիրական հասարակական կազմակերպության համագործակցությամբ, հայտնում են Պաշտպանի աշխատակազմից։

«Պաշտպանի օգնականը հանդես է եկել ելույթով «Եզդիերենի ուսուցման կազմակերպումն ու արդյունավետությունը» թեմայով աշխատանքային քննարկման շրջանակում։ Կլարա Հովհաննիսյանը Մարդու իրավունքների պաշտպան Անահիտ Մանասյանի անունից ողջունել է աշխատաժողովի կազմակերպման նախաձեռնությունը՝ ընդգծելով, որ Պաշտպանը և աշխատակազմը կարևորում են ազգային փոքրամասնություններին պատկանող անձանց իրավունքների պաշտպանությանն ու խթանմանը վերաբերող հարցերը։

Կլարա Հովհաննիսյանը նշել է, որ «ՀՀ մարդու իրավունքների պաշտպանի գործունեության, մարդու իրավունքների և ազատությունների պաշտպանության վիճակի մասին 2025 թվականի տարեկան հաղորդման» շրջանակում անդրադարձ է կատարվել ազգային փոքրամասնությունների լեզուներով դասավանդող մասնագետների սակավությանը, նշված մասնագետներին կրթելու համար նախատեսված բարձրագույն ուսումնական հաստատությունների կամ համապատասխան կառուցվածքային միավորների բացակայությանը, ինչպես նաև ուսուցիչների վերապատրաստման խնդիրներին։

«Պաշտպանը մշտապես ընդգծում է իրավասու մարմինների կողմից ազգային փոքրամասնությունների լեզուներ դասավանդող մասնագետների աշխատանքի շարունակականությունն ապահովելու համար լրացուցիչ քայլերի մշակման և իրականացման անհրաժեշտությունը»,- նշել է Կլարա Հովհաննիսյանը՝ հավելելով, որ ՄԻՊ հաստատության ուսումնասիրության համաձայն՝ մասնագետների սակավության կամ բացակայության խնդիրը կրում է համակարգային բնույթ։ Նրա խոսքով՝ անհրաժեշտ է մշակել և ներդնել ոլորտի կադրային ապահովմանն ուղղված հստակ և համապարփակ կառուցակարգեր՝ բացառելով դրվագային կամ ժամանակավոր լուծումները։

Կլարա Հովհաննիսյանը նաև ընդգծել է, որ Պաշտպանը հատուկ ուշադրություն է դարձնում նախադպրոցական հաստատություններում և դպրոցներում մայրենի լեզվի դասավանդման ապահովմանը, համապատասխան դասագրքերի առկայությանը, ինչպես նաև ազգային փոքրամասնությունների համար նախատեսված ուսումնական գրականության և մասնագիտական նյութերի սակավությանը վերաբերող հարցերին։

«Դպրոցական դասագրքերում և այլ ուսումնական նյութերում սահմանափակ են Հայաստանում ապրող ազգային փոքրամասնությունների և նրանց իրավունքների վերաբերյալ տեղեկությունները։ Այս համատեքստում Պաշտպանը կարևորում է հայեցակարգային և ռազմավարական լուծումների մշակման և իրագործման անհրաժեշտությունը՝ համագործակցելով ազգային փոքրամասնությունների հարցերով զբաղվող կառույցների հետ»,- նշել է Կլարա Հովհաննիսյանը։

Միջոցառմանը բացման խոսքով հանդես են եկել և քննարկվող թեմաների կարևորության մասին խոսել են ՀՀ Ազգային ժողովի մարդու իրավունքների պաշտպանության և հանրային հարցերի մշտական հանձնաժողովի նախագահի պարտականությունները կատարող Ռուստամ Բաքոյանը, Կոնրադ Ադենաուեր հիմնադրամի «Քաղաքական երկխոսություն Հարավային Կովկաս» տարածաշրջանային ծրագրի գիտաշխատող Ֆլորիան Բինդերը, երևանյան գրասենյակի ղեկավար Լիանա Մարուքյանը, «Շամս» մարդասիրական հասարակական կազմակերպության նախագահ Հաջե Բաքոյանը։
Աշխատաժողովի ընթացքում ՀՀ Ազգային ժողովի պատգամավորների, ԿԳՄՍ նախարարության, եզդիական համայնքների, դպրոցների, հասարակական կազմակերպությունների ներկայացուցիչների և փորձագետների մասնակցությամբ քննարկվել են ներառական կրթության, կրթության հասանելիության և հավասար հնարավորությունների ապահովմանն առնչվող մի շարք հարցեր։

Անդրադարձ է կատարվել նաև եզդիաբնակ գյուղական համայնքներում առկա մարտահրավերներին, դպրոց հասնելու ճանապարհի անվտանգությանը, խտրականության և բռնության կանխարգելման մեխանիզմներին, դասագրքերի որակին, ուսուցիչների մասնագիտական պատրաստվածությանը և ուսումնական գործընթացի կազմակերպմանը։

Քննարկվել են նաև կրթական գործընթացից դուրս մնալու կանխարգելման, վաղ բացահայտման և արձագանքման մեխանիզմների ներդրման անհրաժեշտությանը վերաբերող հարցեր։ Ներկայացվել են առկա խնդիրների հաղթահարմանն ուղղված կարճաժամկետ և երկարաժամկետ լուծումներ։

Մարդու իրավունքների պաշտպանը շարունակելու է իր ուշադրության կենտրոնում պահել կրթության իրավունքի ապահովման և խտրականության բացառման հարցերը՝ նպաստելով համակարգային լուծումների մշակմանը և իրականացմանը»,-ասված է հաղորդագրության մեջ։