Ղրիմում պեղումների ժամանակ հայտնաբերվել է վաղ բյուզանդական եզակի խճանկար

Ղրիմի Բախչիսարայի շրջանում՝ Մանգուպ հնավայրում, հնագետները եկեղեցու խորանի հատվածում հայտնաբերել են VI–VII դարերով թվագրվող վաղ բյուզանդական խճանկարի հատված։ Վ. Ի. Վերնադսկու անվան Ղրիմի դաշնային համալսարանի մասնագետների խոսքով՝ սա Լեռնային Ղրիմի հուշարձաններում՝ Խերսոնեսից դուրս, նմանատիպ առաջին գտածոն է, հայտնում է «ՌԻԱ Նովոստի»-ն։

Պեղումներն իրականացվել են Մանգուպի Մեծ բազիլիկի տարածքում։ Դրա հարևանությամբ հնագետները հայտնաբերել են 15×6 մետր չափերով առանձին եկեղեցի, որի ներսում գտնվել են մկրտության ավազան և խորանի խճանկար։ Այն պատրաստված է երեք հիմնական նյութից՝ կարմիր գույն տվող կերամիկական կտորներից, կրաքարից կամ մերգելից և խոշոր գետաքարերից։ Հետազոտողների գնահատմամբ՝ խճանկարը վերաբերում է եկեղեցու գոյության ամենավաղ փուլին։

Պեղումների ընթացքում հայտնաբերվել են նաև VIII–IX դարերի բյուզանդական կապարե կնիքի հատված, X–XIII դարերի՝ սուրբ ռազմիկի պատկերով բրոնզե սրբապատկեր և XIII–XIV դարերի Ոսկե Հորդայի ժամանակաշրջանին բնորոշ՝ երկու մարգարտով ոսկե ականջօղ։ Գիտնականների խոսքով՝ գտածոները վկայում են տարբեր ժամանակաշրջաններում Մանգուպի կարևոր քաղաքական, վարչական և կրոնական նշանակության մասին։

Հնագետները նաև ուսումնասիրել են Կարալեզի բնակավայրն ու հարակից գերեզմանոցը։ Պարզվել է, որ առաջին բնակիչներն այստեղ հաստատվել են VI դարի կեսերին։ Այս տարվա պեղումների ընթացքում հայտնաբերվել է ավելի քան 120 քրիստոնեական և շուրջ 30 մահմեդական տապանաքար, որոնք կօգնեն վերականգնել տարածքի ուշ միջնադարյան պատմությունն ու քաղաքային կառուցվածքը։