«Թե կռվից չգամ․․․․». Գոռ Թումանյանը զոհվեց հոր աչքի առաջ (տեսանյութ)

Կոնսերվատորիայի երկրորդ կուրսի գերազանցությամբ սովորող ուսանող Գոռ Թումանյանը, որը միջազգային բոլոր մրցույթներից մրցանակներով ու մեծ փառքով էր վերադառնում, փառքով պսակեց իր անունը նաև Արցախում:

Գոռի սիրած աղջիկը ԼՈՒՐԵՐ.com-ին պատմում է, որ միասին շատ երազանքներ են ունեցել, որոնք, ցավոք, անկատար մնացին. «Ամեն օր զանգում էր, ու ամեն անգամ սրտատրոփ սպասում էի իր զանգին, երբ ուշացնում էր, սկսում էի վատը մտածել. այս անգամ էլ ուշացրեց, բայց ընդմիշտ»:

Ակտիվ ու կենսուրախ Գոռը երազում էր «Լա Սկալա» օպերայում ելույթ ունենալ ու արդեն Իտալիայից ստացել էր հրավերը, բայց, ավաղ, չհասցրեց: Այս մասին ԼՈՒՐԵՐ.com-ի հետ զրույցում ասաց Գոռի համակուրսեցին՝ Անի Առաքելյանը:

Համառ, ինքնասածի ու նպատակասլաց Գոռը իր յուրաքանչյուր խոսք գործի էր վերածում. «Ընդունվել էր վճարովի ուսուցման համակարգ, բայց այնքան լավ սովորեց, որ փոխեց անվճար: Եթե սխալ լիներ ինքը, մենք պետք է իր ասածին համաձայնեինք. շատ ինքնավստահ էր, բայց դա արդարացված էր»,- նշում է Անին:

Գոռն ու Անին մտերիմ ընկերներ են եղել. Անին հիշում է, թե ինչպես էին դասաժամերին երկու շատախոսներով նստում կողք կողքի ու սկսում անդադար խոսել, իսկ Գոռը երբեմն այնքան արագ էր խոսում, որ չէր հասկանում նրան:

«Վերջին անգամ խոսել ենք մի քանի օր առաջ, ասացի՝ Գոռ, գիտես չէ՞, որ հետ ես գալու, «գլուխդ չտաքացնես», առաջ գնաս, ասում էր՝ 4 ավտոմատով նստած եմ, ինձ ինչ ա եղել, հաստատ լավ ա լինելու, դուխներդ տեղը պահեք»,- ընկերների հետ խոսելիս Գոռն այսպես է հանգստացրել նրանց:

Հայրը որդուն մենակ չի թողել ռազմաճակատում. կամավորագրվել ու մեկնել է առաջնագիծ: Միշտ միասին են եղել, կռվել՝ կողք կողքի:

«Դեպքի օրը մի քանի վայրկյանով բաժանվել են իրարից, որդուց ընդամենը 10 մետր հեռավորության վրա է եղել հայրը, երբ «սնարյադը» խփել է». Գոռը զոհվել է հենց հոր աչքի առաջ»,- պատմում է Անին: 

4 զոհված զինվորներին, այդ թվում նաև Գոռին, հայրն է տեղափոխել Հայաստան: Գոռը զոհվել է հենց այն նույն փոսում, որում երգել է վերջին անգամ ու որը նկարել ու հրապարակել է հայրը:

Գոռ Թումանյանը հուղարկավորվել է Աշտարակում:

Արփինե Հակոբյան