«Առավոտ եկան, մեզ գիշերանոցով դուրս հանեցին, տունը խուզարկեցին, Նարեկին տարան»․ պատմում է արցախցի Նարեկ Թևոսյանի կինը

Համացանցում հայտնվել է երկու արցախցիների հեռախոսազրույցի ձայնագրության մի հատված՝ արցախի բարբառով։ ՀՀ Քննչական կոմիտեն և պետական բյուջեի միջոցներով գործող Հանրային հեռուստաընկերությունն այն ներկայացնում են, թե արցախցի տղամարդիկ զրուցում են ընդդիմության բողոքի ակցիաներին մասնակցելու համար որոշ անձանց գումարներ բաժանելու, մասնակցության և արված ծախսերի համեմատ դրանց սակավ լինելու, այլ անձանց կողմից ավելի շատ գումար վերցնելու, իսկ իրենց դրանից անհամեմատ քիչ տրամադրելու մասին։ Հեռախոսազանգի կողմերից մեկը զրույցի ընթացքում ասում է երկու հազար դրամով ինչ-որ գործողություն անելու մասին և նշում, որ նույնը նախկինում անում էր 40 հազար դրամով։ Առաջին ալիքը սա ներկայացրել է հանրահավաքներին այդ գումարով մասնակցելու գին, իսկ ահա Արցախի բարբառին տիրապետողները հակադարձում են։

«Այդ հատվածը կոնկրետ վերաբերում է շատ ցավալի մի հարցի, որ մեկը մյուսին ասում է՝ «երեկ 2200 դրամով կոշիկ եմ առել, ես ե՞րբ էի 40 հազարից պակաս կոշիկ հագնում», սա է ընդամենը: Իսկ նրանք թարգմանել են, որ «երեկ 2200 դրամ էր ինձ տվել, ես ե՞րբ էի համաձայն նման բան անել, 40 հազար դրամ և այլն»,-հայտարարել է Արցախի նախկին ՄԻՊ Ռուբեն Մելիքյանը։

Այս ձայնագրությունից հետո հայտնի դարձավ, որ մեկ ամսով կալանավորվել է Արցախից ՀՀ բռնի տեղահանված Նարեկ Թևոսյանը։ Նա 29 տարեկան է, երեք անչափահաս երեխաների հայր, Արցախի Վանք գյուղից։

Forrights.am-ը զրուցել է Նարեկ Թևոսյանի կնոջ՝ Սուսաննա Մակյանի հետ։ Նա պնդում է, որ ամուսնուն զրպարտում են։

«Կեղծիք են դրել վրան, ոնց ուզում են, անում են։ Չգիտեմ, թե ամուսինս ում հետ էր խոսում, բայց Նարեկն ասում էր, որ ինչ անենք, լրիվությամբ անկեղծ մասնակցում ենք այդ ցույցին, կյանքում 40 հազար դրամից պակաս կոշիկ հագած չկամ, հիմա երկու հազար դրամանոց կոշիկ եմ հագնում։ Չգիտեմ ով ա այդ զապիսը արել, բայց ոնց ուզել կտրել են, իրանց ուզած ձևով ներկայացրել են հանրությանը»,-ասաց նա։

Նարեկ Թևոսյանին, ըստ Սուսաննայի, հունիսի 5-ի առավոտյան են տանից բերման ենթարկել։ Կինն այսպիսի տեսարան է ներկայացնում, թե ինչպես են իրավապահները, ըստ իրեն, ներխուժել բնակարան և ամուսնուն տարել։ Նա ահազանգում է մարդու իրավունքերի կոպիտ խախտումների մասին։

«Մեր համար հանգիստ տանը նստած էինք, առավոտ շուտ դուռը թակեցին՝ 8:10-ին, յոթ հոգով էին, ոստիկանական համազգեստով։ Սկեսուրս դուռը բացեց, թե բա ոստիկանությունից է, պետք է խուզարկենք, դուրս եկեք։ Սկեսուրս ասում է՝ հա, խնդիր չկա, ուղղակի հագնվենք, ասում են՝ հագնվել չկա, գիշերանոցով էլ դուրս եկեք, պետք է խուզարկենք։ Փոքր երեխաս ջերմության մեջ, տեգրոջս կինը հղի, այդպես՝ գիշերանոցով դուրս եկանք։ Սկեսուրս ասում  է՝ թողեք գոնե հարսս հագնվի, ասում է՝ դուռը բաց թողեք, թող նոր հագնվի։ Տենց վիճակում դուրս եկանք։ Չթողեցին հեռախոսներս էլ վերցնենք, սաղ հավաքեցին տարան, ես իմ հեռախոսը թողել էի սենյակում, թե չէ դա էլ կտանեին։ Սկեսուրիս պայուսակի մեջ տասը հազար դրամ կար, դա էլ տարան, երեխաների պայուսակների մեջ էն, որ սյուվիներ գումարներ է լինում, որ վաճառում են, գնել էինք, որ երեխաները խաղան, դա էլ տարան ու ասացին, որ կեղծ 20 հազար դրամ ունի մամադ»,-Forrights.am-ի հետ զրույցում ասաց Սուսաննան։

Այս ընտանիքում 11 հոգի է բնակվում։ Նարեկը կնոջ, երեխաների, մոր, եղբայրների և նրանց ընտանիքների հետ։ Սուսաննան Forrights.am-ին հայտնեց, որ մինչ Նարեկին բերման ենթարկելն էլ իրենք թիրախավորված են եղել, ըստ նրա, անհայտ անձիք միշտ հետևել են իրենց, ամուսնու եղբայրներին են փորձել բռնի տանել։

«Այս դեպքից մի քանի օր առաջ ամուսնուս եղբայրը գիշերը մեկ անց մտնում էր տուն, իր հղի կինը դուռը բացում էր, որ նրան դիմավորեր, բայց այդ պահին քաղաքացիական հագուստով մի քանի անձիք իրեն առևանգեցին՝ կնոջ աչքի առաջ, դռան շեմից։ Չորս հոգի էին, երկուսը մի թևից էին բռնել, էն երկուսը՝ մյուս, քաշքշելով տարան դեպի մեքենան։ Տեգրոջս, որ տարան մեքենա, իր կինը բղվաղվեց՝ Գրիշային տարան։ Սկեսուրս վազեց դեպի մեքենան, իրեն ասացին՝ քննչականից է, ուզում ենք հետը երկու բառ խոսել, ուզում էին տանել, սկեսուրս չթողեց։ Իրենք Գևորգի հետևից էին եկել, շփոթել Գրիշային էին տանում, Գևորգը մյուս տեգրս է։ Դրանից երկու օր անց նկատեցինք, որ տան կողքերը շատ մարդիկ կան, մեզ էին վերահսկում, մի վեց-յոթ հոգի էին»,-ասաց Սուսաննան։

Նարեկի մայրն էլ՝ Թամարա Գևորգյանը, փոխանցեց, որ որդուն ազատազրկելով չեն կարողանալու կանգնեցնել իրենց պայքարը, և, որ ինքը պատրաստվում է որդու փոխարեն մասնակցել առաջիկա հանրահավաքին։

Forrights.am-ը Սուսսաննա Մակյանի պնդումների առնչությամբ գրավոր հարցումներ է ուղղել Քննչական կոմիտեին և Ներքին գործերի նախարարությանը։ Թեմային կանդրադառնանք նաև այս պատասխանները ստանալուց հետո։

Նարեկ Կիրակոսյան

Այս թեմայով Արդյո՞ք ՀՀ-ն պետք է դուրս գա ԵԱՏՄ-ից՝ հաշվի առնելով, որ ԵՄ-ն առաջին հերթին մաքսային միություն է. ԱԺ «Հայաստան» խմբակցություն Լավրովը հայտնել է՝ Ալմաթիում քննարկվել է արդյոք ՀԱՊԿ-ից Հայաստանի դուրս գալու հարցը Գավառ-Մարտունի ճանապարհին բախվել են բեռնատարն ու մարդատարը․ BMW-ի վարորդի դին հատուկ տեխնիկայի օգնությամբ են դուրս բերել «BMW»-ն մխրճվել է բեռնատարի կցորդիչի մեջ. մшհացածի դին ավտոմեքենայից դուրս է բերվել հատուկ տեխնիկայի միջոցով Հայաստանը որևէ ազդակ չի ուղարկել ԱՊՀ-ից դուրս գալու ցանկության մասին․ Սերգեյ Լեբեդև Սարգիս Գալստյանի գործով նախաքննությունը չի ավարտվել, նրա կինը մեղադրյալի կարգավիճակ չունի Սպիտակ տունը հայտնել է ՆԱՏՕ-ին Ուկրաինայի անդամակցության պայմանները ՀԱՊԿ-ից դուրս գալը Հայաստանի կառավարության որոշելիքն է. ԱՄՆ պետքարտուղարություն Աբրահամ Գասպարյանը դուրս է գրվել հիվանդանոցից․ մանրամասներ Սևանա լճից դուրս է բերվել ապօրինի տեղադրված 101 հատ խեցգետնաորսիչ և 7 հատ ձկնորսական ցանց