Աճուրդի է հանվել ընթրիքը Twitter-ի հիմնադիրներից մեկի հետ

Հարուստ մարդկանց թիվը ժամանակակից աշխարհում աճում է բավականին ինտենսիվ կերպով։ Զուգահեռաբար ավելանում է նաև այն մարդկանց թիվը, ովքեր ցանկանում են ֆինանսական հարցերում շատ բան սովորել նրանցից։ Գործարարներն իրենց հերթին օգտվում են դրանից՝ երկրպագուներին հնարավորություն տալով շփվել իրենց հետ գումարի դիմաց, սակայն նրանք դա անում են ոչ թե անձնական շահից ելնելով, այլ բարեգործական նպատակներով. գրում է rbc.ru-ն։

Վերը նշված գործարարներից է նաև Twitter սոցցանցի հիմնադիրներից մեկը՝ Ջեք Դորսին. նա միաժամանակ բջջային վճարումներով զբաղվող Square ընկերության հիմնադիրն է։

Դորսիի հետ ընթրիքը հանվել է աճուրդի. աճուրդը կավարտվի մայիսի 16-ին, արդյունքում՝ կընտրվի 7 երջանիկ, ովքեր Սան Ֆրանցիսկոյում կընթրեն գործարարի հետ։

Նշենք, որ Kompolt աճուրդի տունը, որը զբաղվում է նման առցանց վաճառքներով, արդեն կատարել է նախնական՝ բավականին դժվար ընտրություն։ Աճուրդին թույլատրվել է մասնակցել միայն նրանց, ովքեր անցել են գործարար գիտելիքների և որակավորման ստուգում։ Հայտնի է նաև, որ վաճառքի նախնական գինը 5.000 դոլար է, բայց այդ թիվն աճուրդի ընթացքում միանշանակ կաճի։

Վաճառքից ստացված գումարը կուղղվի բարեգործական նպատակների իրականացմանը. այն կստանա Build.Org նախագիծը, որի նպատակն ամերիկացի երեխաներին դպրոցական կրթության մեջ ներգրավելը և նրանց մեջ կրթության նկատմամբ հետաքրքրություն ձևավորելը։