Արդարադատության նախարարության «Մարզային հանդիպումներ» ծրագրի երկրորդ այցը Գավառում էր

ՀՀ արդարադատության նախարարության պատվիրակության այցի անդրադարձն ըստ ԱՐՄԵՆՊՐԵՍ լրատվական գործակալության:

Հոկտեմբերի 21-ին Գեղարքունիքի Շահերի պաշտպանության եւ աջակցության կենտրոնում կազմակերպվել էր հանդիպում ՀՀ արդարադատության նախարարության պատվիրակության հետ:

Պատվիրակությունը ղեկավարում էր ՀՀ արդարադատության փոխնախարար Արամ Օրբելյանը:

Պատվիրակության կազմում էին նախարարության ՔԿԱԳ գործակալության պետի տեղակալ Արգամ Ստեփանյանը, նախարարության օրինականության վերահսկողության տեսչության բաժնի պետ Դանիել Մխեյանը, ԴԱՀԿ իրավաբանական վարչության պետ Գագիկ Միրիջանյանը եւ նախարարության մամուլի քարտուղար Կարինե Քալանթարյանը: Հանդիպմանը մասնակցում էին Գավառի քաղաքացիներ, ՀԿ ներկայացուցիչներ եւ համայնքի առավել ակտիվ անդամներ:

«Մարզային հանդիպումներ» ծրագրի հերթական հանդիպում-քննարկմանը ներկայացվեցին նոտարական, քաղաքացիական կացության ակտերի գրանցման, իրավաբանական անձանց պետռեգիստրի գործակալություններից օգտվելու կարգը, դատական ակտերի հարկադիր կատարողների գործունեությունը: Խոսվեց նաեւ իրականացված բարեփոխումների, ինչպես նաեւ ձեռնարկվելիք քայլերի մասին:

Հանդիպման երկրորդ մասում քննարկման մասնակիցները ներկայացուցիչներին տվեցին իրենց հուզող հարցերը'ստանալով սպառիչ պատասխաններ եւ պարզաբանումներ:

Ինչպես «Արմենպրես»-ի թղթակցին ներկայացրեց արդարադատության նախարարության մամուլի քարտուղարը, մարզային հանդիպումների շրջանակներում նախարարությունը նպատակ ունի հանրությանը իրազեկել արդարադատության եւ հանրային ծառայություններ իրականացնող համակարգերում տեղի ունեցած բարեփոխումների մասին, ինչպես նաեւ բնակչությանը սեփական իրավունքները պաշտպանելու մասին գիտելիքներ փոխանցել: Հանդիպման շրջանակներում քաղաքացու եւ արդարադատության նախարարության միջեւ անմիջական կապը հնարավորություն է տալիս վեր հանել նոր խնդիրներ, անդրադառնալ դրանց եւ մշակել համապատասխան բարեփոխումների նախագծեր:

Արդարադատության նախարարության «Մարզային հանդիպումներ» ծրագրին Գավառ քաղաքում իրենց աջակցությունն էին բերել ՇՊԱԿ-ը եւ Մարդու իրավունքների պաշտպանության Սախարովի անվան կենտրոնի Գավառի գրասենյակը: