Եգիպտացիներն ամուսնանում են սիրիացի փախստական կանանց հետ, քանի որ նրանք էժան են արժենում

Հազարավոր սիրիացի կանայք 2.5 տարի շարունակվող սիրիական հակամարտության ընթացքում արդեն հասցրել են տեղափոխվել Եգիպտոս: Եգիպտացի երիտասարդ տղաները շատ ոգևորված են այս հանգամանքից: Սիրիացի կանայք այստեղ համարվում են ավելի գեղեցիկ, պակաս բարդույթավոր և, որ ամենակարևորն է, շատ ավելի քիչ հավակնոտ պահանջներով, քան եգիպտուհիները: Սակայն այ հենց սիրիացի կանանց կողմից եգիպտացի տղամարդիկ նույն ոգևորությունը չեն ստանում:

Der Spiegel գերմանական պարբերականը պատմում է երտասարդ եգիպտացի բժշկի մասին: Մուհամմեդ Յահին վաղուց արդեն հաճույքով ամուսնացած կլներ: 31-ամյա բժիշկը մի քանի անգամ կանգնած է եղել ամուսնական օղակներով կապվելու շեմին, սակայն ամեն անգամ հարսնացուի ընտանիքի հետ օժիտի հետ կապված հարցերում առաջ եկած տարաձայնությունների պատճառով նրա պլանները ձախողվել են: (Նշենք, որ իսլամական շարիաթի համաձայն՝ փեսացուն ամուսնանալիս որոշակի գումար՝ մահր, է վճարում հարսնացուի ընտանիքին-Ծնթ. Լուրեր.com):

Եգիպտոսում միջին խավին պատկանող ընտանիքները որպես օժիտ ակնկալում են ստանալ առնվազն 50.000 եգիպտական գինեյ գումար, ինչը հավասար է 5500 եվրոյի: Որոշ ընտանիքներում այդ գումարային շեմը կազմում է 7-8 հազար եվրո: Իհարկե, երիտասարդ բժշկի համար դա հայթայթելի գումար է: Սակայն դրա հետ մեկտեղ հարսնացուն ակնկալում է նաև ապահովված լինել կահավորված բնակարանով: Իսկ եթե դու վարձում ես բնակարանը, ուրեմն՝ այդ աղջկա մասին ավելի լավ է մոռանաս, քանի որ եգիպտուհիները շատ բարձր խաղադրույքներով են խաղում՝ իրենց ֆինանսական կայունությունն ապահովելու նպատակով, ինչը հատկապես կարևորվում է վերջերս Եգիպտոսին վրա հասած ծանր ժամանակներում. գրում է պարբերակնը:

Մուհամմեդ Յահին չի կարող իրեն թույլ տալ բնակարան, որը միջինում արժի 22 հազար եվրո, հատկապես մի երկրում, ուր ամսական միջին աշխատավարձը կազմում է 200 եվրո ողջ ընտանիքի համար:

Եգիպտոսում ամուսնությունների համար վճարվող բարձր գինը վաղուց հասարակության լուրջ խնդիրներից մեկն էր: Իսկ 2011-ի հեղափոխությունից հետո դրությունը երկրում առավել սրվեց առաջ եկած ճգնաժամի պատճառով: Մնում է միայն տարիներ շարունակ գումար կուտակել հարսանիքի համար:

Որոշ եգիպտացի տղամարդկանց համար միակ հույսը մնացել են սիրիացի կանայք, ովքեր, իրենց երկրում բռնկված պատերազմի պատճառով անվտանգություն փնտրելով, տեղափոխվել են Եգիպտոս:

Եգիպտացի տղամարդիկ առաջնորդվում են այն հանգամանքով, որ այդ կանայք ավելի քիչ հավակնություններ են ներկայացնում իրենց և նման բարձր պահանջներ չեն դնում: Պատերազմի փախստական դարձած կինը բավարարվում է նույնիսկ վարձած բնակարանով՝ ի տարբերություն կահավորված 4 սենյականոց սեփական բնակարան պահանջող եգիպտուհիների:

Ինչպես պատմում է Մուհամմեդ Յահին, դա լավ շանս է ընդձեռում իրենց: «Սիրիացի կանայք ավելի գեղեցիկ են, ավելի համեղ են պատրաստում և շատ ավելի մեծ հարգանք են տածում իրենց ամուսինների նկատմամբ, քան եգիպտուհիները»,-խոստովանում է Մուհամմեդը: Իհարկե, նա նաև նշում է, որ դա չի նշանակում, թե ինքը պատրաստվում է օգտվել փախստական դարձած կանանց վիճակից: Ընդհակառակը՝ նա պատրաստ է նույնքան գումարով օժիտ վճարել սիրիացի կնոջ հետ ամուսնանալիս, որքան որ նախատեսված է եգիպտուհու համար: Միայն թե երիտասարդ զույգը համատեղ կյանքը ստիպված է լինելու սկսել վարձած բնակարանում:

Որպես վերջաբան նշենք, որ պատերազմի փախստական դարձած կանայք հյուրընկալող երկրներում առավել խոցելի խավ են ներկայացնում: Հենց նրանք են հիմնականում սեռական բռնությունների, շահագործման և հարկադիր ամուսնությեւնների զոհ դառնում: Հորդանանում արդեն գրանցվել են դեպքեր, երբ սիրիացի աղջիկների ծնողները ստիպել են իրենց դուստրերին ամուսնանալ Պարսից ծոցի երկրների արաբների հետ նրանց ապագան ապահովելու նպատակով:

Սակայն Եգիպտոսի դեպքում նման վիճակագրություն չկա, քանի որ Եգիպտոսում սիրիացիները չեն բնակվում փախստականի կարգավիճակով այնպես, ինչպես Սիրիայի հարևան երկրներում: Եգիպտոսը բավական հեռու է, և այնտեղ հասնելու համար սիրացիները պետք է գոնե հնարավորություն ունենային տոմս գնել և տեղափոխվել ընատնիքով: Հետևաբար, նրանք այդ երկրում պարզապես ժամանակավոր բնակվողներ են իրենց դիտարկում՝ հաստատվելով այդտեղ անվտանգության նկատառումներից ելնելով: Նրանք, բնականաբար, ունեն իրենց որոշակի խնայած գումարը և ինչ-ինչ աշխատանք կարողանում են հայթայթել գոյություն պահպանելու համար, ուստի՝ այս երկրում սիրիացիներն այն մահից մազապուրծ հարկադիր փախստականները չեն, ինչ որ Սիրիայի հարևան Հորդանանում կամ ասենք Թուրքիայում: