Եվրամիությունը մեծ հույսեր է կապում Իրանի նոր նախագահի հետ` միջուկային խնդրի լուծման հարցում

Եվրամիությունը մեծ հույսեր է կապում Իրանի նորընտիր նախագահ Հասան Ռուհանիի հետ Իրանի միջուկային խնդիրը դիվանագիտական ճանապարհով կարգավորելու հարցում. РИА Новости-ին հայտնել է ԵՄ արտաքին քաղաքական գերատեսչության մամլո ծառայությունը:

«ԵՄ արտաքին քաղաքական հարցերով ներկայացուցիչ Քեթրին Էշթոնը հակված է Իրանի նոր ղեկավարի հետ` համագործակցելու Իրանի միջուկային խնդրին խաղաղ լուծում տալու նպատակով»,-ասել է գործակալության խոսակիցը:

Հիշեցնենք, որ նախօրեին Իրանում կայացած նախագահական ընտրությունների արդյունքում առաջին փուլով հաղթանակ տարավ ռեֆորմիստական ճյուղի թեկնածու Հասան Ռուհանին:

Իրանի նորընտիր նախագահին ժառանգություն է հասել «բարդ վիճակում» գտնվող երկիր` բարձր սղաճով և լճացող տնտեսությամբ: Ռեֆորմիստ նախագահի առջև որպես առաջնային խնդիր` կանգնած են տնտեսական խնդիրները, մասնավորապես` տնտեսության վերականգնումը, ինֆլյացիայի տեմպերի դանդաղեցումը, իրանական դրամական արժույթի դեվալվացիան կանխելը, գործազրկության դեմ պայքարը:

Լինելով բանակցությունների կողմնակից` Ռուհանին պատրաստ է փոխզիջումների գնալ Արևմուտքի հետ տնտեսական պատժամիջոցները չեղյալ հայտարարելու համար` իհարկե, «պահպանելով Իսլամական հանրապետության ազգային շահերը»: Նոր նախագահն իր հռետորիկայում հանդես է գալիս «քաղաքական էթիկայի պահպանման և աշխարհի հետ կառուցողական համագործակցության» պահպանման գաղափարներով: