Վրաց վարչապետ Իվանիշվիլին մեկնում է Իսրայել` վերականգնելու իսրայելա-վրացական հատուկ հարաբերությունները

Վրաստանի վարչապետ Բիձինա Իվանիշվիլին երկուշաբթի օրը երկօրյա այցով մեկնելու է Իսրայել` նպատակ ունենալով վերականգնել երկու երկրների միջև հատուկ հարաբերութունները՝ ընդհուպ մինչև ռազմավարական դաշնակիցների մակարդակի:

Իսրայելի նախագահ Շիմոն Պերեսի աշխատանքային գրաֆիկում օրվա առաջին կեսին նախատեսված է ճաշ կազմակերպել` ի պատիվ վրաց վարչապետի և նրա պատվիրակության: Իսրայելի վարչապետ Բենիամին Նեթանյահուի աշխատակազմից РИА Новости-ին հայտնել են, որ երկու վարչապետների հանդիպումը կկայանա երեքշաբթի օրը:

Իսրայելական ԶԼՄ-ների տվյալներով` վրաց պատվիրակությունը պլանավորում է նաև այցելել տեղի պաշտպանական հաստատությունները և բարձրացնել Իսրայելից զենք գնելը վերականգնելու հարցը:

Նշենք, որ Իսրայելը, 2008թ. վրաց-ռուսական հակամարտությունից առաջ արդեն չցանկանալով վատացնել հարաբերութունները Ռուսաստանի հետ, դադարեցրել էր Թբիլիսիի հետ ռազմական ոլորտում համագործակցութունը:

Jerusalem Post-ին տված հարցազրույցի ժամանակ Իվանիշվիլին կատարվածի համար մեղադրել էր նախագահ Միխայիլ Սաակաշվիլիին` նշելով, որ նա «հիմար սխալներ» է թույլ տվել, որոնք հանգեցրել են Իսրայելի և Վրաստանի միջև հատուկ հարաբերությունների սառեցմանը: