Վաշինգտոնը Մոսկվայից պահանջում է արտահանձնել ԿՀՎ նախկին աշխատակից Սնոուդենին

ԱՄՆ-ի իշխանություններն ակնկալում են, որ ռուսական կողմն իրենց կարտահանձնի ԿՀՎ-ի նախկին աշխատակից Էդվարդ Սնոուդենին, ով հունիսի 24-ին Մոսկվայից պատրաստվում է թռչել Հավանա: Այս մասին գրում է reuters-ը` հղում կատարելով ԱՄՆ-ի Ազգային անվտանգության մամլո քարտուղարին:

Վաշինգտոնը Մոսկվային առաջարկել է դիտարկել բոլոր հնարավոր տարբերակները Սնոուդենին ձերբակալելու և ԱՄՆ վերադարձնելու համար: Սվելի վաղ ԱՄՆ-ն իր դժգոհությունն էր հայտնել Հոնգկոնգի և Չինաստանի իշխանությունների գործողությունների նկատմամբ, ովքեր թույլատրել էին Սնոուդենին լքել իրենց երկիրը` չնայած նրան արտահանձնելու մասին ներկայացված պաշտոնական հայցին:

ՌԴ Պետդումայի միջազգային հարցերով հանձնաժողովի ղեկավար Ալեքսեյ Պուշկովն իր հերթին հայտարարել է, որ Սնոուդենի արտահանձնումը ԱՄՆ-ին քիչ հավանական է, քանի որ երկու երկրների միջև հարաբերություններն այժմ շատ բարդ փուլում են, և հաշվի առնելով Մոսկվայի հասցեին ԱՄՆ-ի բացասական նախաձեռնությունները`Վաշինգտոնը դժվար թե կարող է հույս ունենալ Կրեմլի կողմից ցուցաբերվելիք փոխըմբռնմանը. մեջբերում է Lenta-ն:

Հիշեցնենք, որ ԱՄՆ-ի ԿՀՎ-ի գործողությունները բացահայտած Սնոուդենը հունիսի 23-ին ժամանել էր Մոսկվա WikiLeaks-ի ներկայացուցիչների ուղեկցությամբ, ովքեր պահպանում են նրա իրավաբանական ուղեկցությունը: Ռուսական իրավապահ մարմինները և սահմանապահ ծառայությունները հայտարարել են, որ Սնոուդենին ձերբակալելու որևէ հիմք չունեն: