Անջելինա Ջոլին ՄԱԿ-ում իր ելույթի ժամանակ պատմել է կոնֆլիկտների գոտում բռնաբարությունների մասին

Հոլիվուդյան դերասանուհի Անջելինա Ջոլին, ելույթ ունենալով ՄԱԿ-ի Անվտանգության խորհրդի նիստում, պատմել է ռազմական գործողությունների գոտում տեղի ոնեցող բռնաբարությունների մասին. գրում է The Los Angeles Times-ը: Փախստականների հարցերով ՄԱԿ-ի բարի կամքի դեսպան հանդիսացող դերասանուհին կոչ է արել միաձայն բանաձև ընդունել, որի համաձայն` բռնաբարությունը պետք է ընկալվի որպես հակամարտությունները սրող և խաղաղ գործընթացներին խոչընդոտող գործոն:

Որպես օրինակ Ջոլին նշել է այն պատմությունները, որոնք ինքը լսել է փախստականների ճամբարներում իր այցելությունների ժամանակ: «Հարյուր հազարավոր, եթե ոչ միլիոնավոր կանայք, երեխաներ և տղամարդիկ բռնության են ենթարկվում: Դուք եք չափորոշիչներ սահմանում, ուստի եթե ԱԽ-ն բռնաբարության սեռական դաժանության հարցը առաջնային դարձնի կոնֆլիկտները հարթելիս, ապա հնարավոր կլինի առաջընթաց գրանցել: Եթե դա անտեսվի, մարդկային այդ սարսափը չի դադարի երբեք»,-ասել է Ջոլին իր ելույթի ընթացքում:

Խորհուրդը Ջոլիի ելույթից հետո բանաձև է ընդունել, որով պահանջում է անմիջապես դադարեցնել բոլոր տեսակի զինված կոնֆլիկտներում հակամարտող կողմերից յուրաքանչյուրի կողմից սեռական բռնության գործադրման դեպքերը: