Հրայր Թովմասյան. «Մեր հանրության մի մասը հոգեբանական դեպրեսիայի մեջ է»

ՀՀ արդարադատության նախարար Հրայր Թովմասյանն անդրադառնում է հոկտեմբերի 26-ին ԱԺ-կառավարություն հարցուպատասխանի ժամանակ պատգամավոր Վիկտոր Դալլաքյանի սեռական հանցագործությունների դեպքում ամորձատում կիրառելու առաջարկին: «Առաջին հայացքից թվում է, թե ձեր բարձրացրած հարցի լուծումը իրավական հարթության մեջ է: Ես դեմ չեմ պատժամիջոցի խստացման առաջարկը քննարկելուն: Գուցե թե դա զսպող դեր խաղա: Բայց այն կարծիքին եմ, որ որևէ երևույթի դեմն առնելու համար հարկավոր է պարզել այն ծնող պատճառները և դրանք վերացնել: Նման արտառոց դեպքերը ինձ, որպես արդարադատության ոլորտի պատասխանատուի և որպես քաղաքացու շատ են մտահոգում: Ձեր նշած դեպքերը, ինչպես նաև , ընտանեկան կյանքում նկատվող սպանությունները (ծնողը` զավակին, զավակը` ծնողին) ինձ բերում են այն հետևության, որ մեր հանրության մի մասը հոգեբանական դեպրեսիայի մեջ է: Ցավով պիտի նկատեմ, որ մեզ դեռևս չի հաջողվել ու այսօր ևս չի հաջողվում հանրությանը ներարկել, տալ այնպիսի արժեհամակարգ, որը կնպաստի ամուր պետականության կայացմանը: Դրա փոխարեն տեղի է ունեցել ցածրաճաշակ արժեհամակարգի հաղթարշավ, այն գրավել է եթերը, այն ձևավորում է հասարակական աղճատված հարաբերություններ: Քաղաքագիտության մեջ այսպիսի հասկացություն կա` բնազդային հանրություն: Դա այն դեպքն է, երբ հանրությունն ինչ ինչ պատճառներով կորցնում է իր ընդհանուր նպատակները, բարոյական ուղենիշները և հեզտհետե վերածվում անկառավարելի զանգվածի: Նման դեպքերում գլուխ են բարձրացնում ստորին բնազդները: Մենք, որպես պետություն, հիմա դժվարին խնդրի առաջ ենք կանգնած, և պարտավոր ենք ճիշտ գնահատել իրավիճակը և արմատական քայլեր իրականացնել հանրային կյանքն առողջացնելու ուղղությամբ: Սա այն դեպքն է, երբ այլընտրանք պարզապես չկա»՝ ՀՀ արդարադատության նախարարության տեղեկատվական կենտրոնի հաղորդմամբ։