Թմրամիջոցների հայտնաբերման 4 դեպք

Հոկտեմբերի 26-ին, ժամը 15.20-ին, ոստիկանության Գյումրիի բաժնի ծառայողները, թմրամիջոց պատրաստելու և պահելու կասկածանքով, Գյումրի քաղաքի Խրիմյան Հայրիկի փողոցում գտնվող մի կիսաքանդ տնակից բերման են ենթարկել երկու տղամարդու: Զննությամբ տնակից հայտնաբերվել և առգրավվել են տարաներ` տարբեր հեղուկ զանգվածներով, «Պենտալգին» դեղահաբի դատարկ տուփեր, օգտագործված ներարկիչներ: Բերման ենթարկվածները հայտնել են, որ իրենք թմրամոլ են, իսկ հայտնաբերված դեղամիջոցները պատկանում են իրենց: Նշանակվել է դատաքիմիական փորձաքննություն: Կատարվում է հետաքննություն:

Հոկտեմբերի 26-ին` ժամը 18.00-ի սահմաններում, ոստիկանության ծառայողները Երևան քաղաքի հյուրանոցային համալիրներից մեկի մոտից բերման են ենթարկել օտարերկրյա մի քաղաքացու: Խուզարկությամբ նրա պայուսակից հայտնաբերվել են 6,6 գրամ հաշիշանման, 0,8 գրամ ափիոնանման և 0,6 գրամ սպիտակ գույնի բյուրեղանման զանգվածներ: Բերման ենթարկվածը հայտարարել է, որ հայտնաբերված թմրամիջոցներն ինքը սեպտեմբերի 14-ին «Զվարթնոց» օդանավակայանի մաքսակետով անցկացրել է ՀՀ տարածք` իր օգտագործման համար: Նշանակվել է դատաքիմիական փորձաքննություն: Կատարվում է հետաքննություն:

Հոկտեմբերի 26-ին, ժամը 20.30-ին, ոստիկանության ծառայողները մի քրեական գործի շրջանակներում Հրազդան քաղաքի ռեստորանային համալիրներից մեկում կատարված խուզարկությամբ հայտնաբերել են տարբեր փաթեթներով փաթեթավորված կանեփանման զանգվածներ և կանեփի սերմեր: Հայտնաբերվածն ուղարկվել է փորձաքննության: Կատարվում է հետաքննություն:

Նույն օրը՝ ժամը 20.40-ին, ոստիկանության ծառայողները, թմրամիջոց պահելու կասկածանքով, մետրոպոլիտենի «Զորավար Անդրանիկ» կայարանից բերման են ենթարկել երկու երիտասարդի: Նրանցից մեկի բաճկոնի գրպանում հայտնաբերված ծխախոտատուփում առկա է եղել թղթյա փաթեթ` լցված դեղնականաչավուն զանգվածով: Հայտնաբերվածն ուղարկվել է փորձաքննության: Կատարվում է հետաքննություն: