Հիրոսիմա քաղաքում հարգել են միջուկային ռումբի զոհերի հիշատակը

Այսօր Ճապոնիայի Հիրոսիմա քաղաքում ընթանում են 2-րդ համաշխարհային պատերազմի դաժան իրադարձությունների հիշատակին նվիրված միջոցառումները: 1945թ. օգոստոսի 6-ին ամերիկյան ռմբակոծիչները Հիրոսիմա քաղաքի վրա ատոմային ռումբ նետեցին՝ ոչնչացնելով այն երկրի երեսից, ինչի հետևանքով զոհվեց 80 հազար մարդ, մոտավորապես այդքանն էլ մահացավ ճառագայթումից:

Խաղաղության զբոսայգում ավանդաբար ընթացել է զոհերի հիշատակի արարողությունը, որին հետևել է մեկ րոպե լռություն:

Նագասակի քաղաքում հիշատակի արարողությունը տեղի կունենա օգոստոսի 9-ին:

Հիրոսիմա և Նագասակի քաղաքների ատոմային ռմբակոծությունը մարդկության պատմության մեջ միջուկային ռումբի կիրառման միակ դեպքն է: Տարիներ անց զինվորական փորձագետները եկան այն եզրակացությանը, որ տվյալ շրջանում պատերազմական իրավիճակը չէր պահանջում նման կտրուկ ռազմական միջամտություն: