Գլխավոր քարտուղարի ուղերձը՝ Միջուկային զենքի դեմ պայքարի միջազգային օրվա 4-րդ տարեդարձի առթիվ

Տասնհինգ տարի առաջ Միջուկային փորձարկումների արգելման մասնակի պայմանագրի ընդունմամբ միջազգային հանրությունը ավարտին հասցրեց առաջին քայլերը՝ ուղղված միջուկային զենքի փորձարկումներին հավիտյանս վերջ դնելուն: Այս նպատակը զինաթափման օրակարգում դեռևս անավարտ և լուրջ խնդիր է:

Չնայած նրան, որ քսան տարի է անցել այն բանից ի վեր, ինչ Զինաթափման հարցերով խորհրդաժողովը բանակցություններ սկսեց Միջուկային փորձարկումների արգելման համապարփակ պայմանագրի շուրջ (ՄՓԱՀՊ), այս պայմանագիրը դեռևս չի մտել ուժի մեջ:
Այսօր ամբողջ աշխարհում 183 երկրներ ստորագրել են ՄՓԱՀՊ և 159-ը՝ վավերացրել են այն: Այս տարի ավելի վաղ Կորեայի Ժողովրդա-դեմոկրատական Հանրապետության կողմից միջուկային զենքի փորձարկման դեմ ուղղված ուժեղ և միասնական պատասխանը ցույց տվեց միջազգային հանրության նվիրվածությունը՝ աջակցելու միջուկային փորձարկումների դեմ պայքարի համաշխարհային նորմերին: Այդուհանդերձ, որոշ պետություններ դեռևս զերծ են մնում քայլեր ձեռնարկելուց՝ դրանով իսկ կանխելով ՄՓԱՀՊ ուժի մեջ մտնելը:
Ոչ մի արդարացուցիչ հանգամանք չկա՝ այս մեծ նպատակին հասնելը հետաձգելու համար: Ժամանակն է համաշխարհային արգելքով՝ այս մարտահրավերի դեմ պայքարի հնարավոր ամենավստահելի միջոցով, կանխել միջուկային փորձարկումների պատճառով առաջացող սարսափելի մարդկային և բնապահպանական հետևանքները: Միաժամանակ, բոլոր պետությունները պետք է առկախեն միջուկային փորձարկումները: Ես նաև խրախուսում եմ քաղաքացիական հասարակությանը, գիտական շրջաններին և այլոց՝ շարունակել խթանել այս հույժ կարևոր արշավը:

Նշելով Միջուկային զենքի փորձարկումների դեմ պայքարի միջազգային օրը, եկեք վերջ դնենք միջուկային զենքի փորձարկումներն և հասնենք միջուկային զենքից ազատ աշխարհ: