Քենիայում ազատ են արձակվել առևտրի կենտրոնում պահվող բոլոր պատանդները

Նայրոբիում առևտրի կենտրոնում գերի վերցված բոլոր պատանդներն ազատ են արձակվել. սեպտեմբերի 24-ի գիշերը հայտարարել է Քենիայի ՆԳ նախարարը. տեղեկացնում է Agence France-Presse-ը: Հատուկ նշանակության ջոկատի գործողությունները ավարտին են մոտենում, ասել է նախարարը:

Նշենք, որ սեպտեմբերի 21-ին Նայրոբիում պատանդ էին վերցվել Westgate առևտրի կենտրոնի տասնյակ հաճախորդներ, որոնց թվում` նաև օտարերկրացիներ: Համաձայն պաշտոնական հայտարարությունների` ահաբեկիչների հարձակման արդյունքում զոհվել է 62 մարդ, շուրջ 200-ը վիրավոր է:

Իսկ ինչպես հաղորդում է The Washington Post-ը` հղում կատարելով Քենիայի ՆԳ նախարար Ամին Մուհամմեդի հայտարարությանը, առևտրի կենտրոնը գրաված գրոհայինների թվում եղել է նաև երկու կամ երեք ԱՄՆ-ի քաղաքացի: Համաձայն նախարարի խոսքերի` ԱՄՆ-ի քաղաքացիներ հանդիսացող ահաբեկիչները 18-19 տարեկան երտասարդներ են եղել, որոնք  արմատներով ծագում են Սոմալիից և արաբական աշխարհի այլ երկներից:

ԱՄՆ-ի պետքարտուղարությունն իր հերթին հայտարարել է, որ  դեռևս տեղեկություններ չունի Նայրոբիի ահաբեկչության մեջ ամերիկացիների ունեցած մասնակցության մասին: