Իրանի նախագահը ճանաչել է հրեաների ցեղասպանությունը

Իրանի նախագահ Հասան Ռոհանին, ով մասնակցում է Նյու Յորքում ՄԱԿ-ի Գլխավոր ասամբլեայի նստաշրջանին, CNN-ին տված իր հարցազրույցի ժամանակ դատապարտել է հրեաների հոլոքոստը և հայտարարել, որ այն «մարդկության դեմ հանցագործություն» է` դրանով իսկ ճանաչելով հրեաների ցեղասպանության փաստը:

«Պատմության մեջ մարդկության դեմ իրականացված ցանկացած հանցագործություն, որի թվում` նացիստների կողմից հրեաների դեմ իրականացրած հոլոքոստը, արժանի են դատապարտման»:

Միաժամանակ Իրանի նախագահը քննադատել է Իսրայելի կառավարության քաղաքականությունը` նշելով, որ եթե նացիստները նրանց հանդեպ հանցագործություն են թույլ տվել, դա չի նշանակում, որ այժմ իրենց կարելի է բռնանալ մարդկանց մեկ այլ խմբին և խլել նրանց հողերը:

Նշենք, որ Ռոհանիից առաջ նախորդ նախագահ Մահմուդ Ահմադինեժադը հերքում էր հոլոքոստի փաստը:

Նշենք նաև, որ նախագահ Ռոհանին, ելույթով հանդես գալով Գլխավոր ասամբլեայի նիստին, անդրադարձել է Իրանի միջուկային ծրագրի խնդրին` հայտարարելով, որ Իրանի միջուկային ծրագիրը խաղաղ բնույթ է կրում:

«Իրանը պատրաստ է դադարեցնել Արևմուտքի հետ միջուկային ծրագրի հետ իր վեճերը, եթե երկխոսությունը տարվի երկկողմ շահերից ելնելով»,-ասել է նախագահ Ռոհանին:

Նա հայտարարել է, որ պատրաստ է համագործակցության և ցանկանում է ազատվել ԱՄՆ-ի հետ լարված հարաբերություններից:

«Այն դեպքում միայն, երբ ԱՄՆ-ն դադարի պաշտպանել ագրեսորների շահերը և քաղաքական նախաձեռնություն ի հայտ բերի, մենք կկարողանանք համաձայնության գալ տարաձայնությունների լուծման հարցում»,-ասել է Ռոհանին: