Հնդկական տաճարի մոտ խուճապահար մարդկանց խցանումից 115 մարդ է զոհվել

Հնդկաստանի Մադհյա Փրադեշ նահանգում տաճարի մոտ խուճապի հետևանքով առաջ եկած մարդկանց քաոսի պատճառով զոհերի քանակը հասել է 115-ի, որոնց թվում կա 30 երեխա. գրում է Times of India-ն: Տուժածների թիվն անցնում է 100-ից:

Մարդկանց խցանումը սկսվել էր Սինդհ կամուրջի վրա: Նախնական վարկածի համաձայն` խցանման պատճառը տարածված լուրերն էին, թե Սինդհ կամուրջը կարող է փլուզվել նրա վրայով մեքենաներով երթևեկող ուխտավորների պատճառով: Մարդկային քաոսը կարգավորելու համար ոստիկանները մահակներ են գործի դրել, ինչը միայն ավելի է բարդացրել իրավիճակը` առաջացնելով խուճապ: Մասնավորապես` մարդիկ սկսել են ջուրը նետվել մահակի հարվածներից ազատվելու համար: Փրկարար ծառայություններից տեղեկացնում են, որ դեռևս ոչ բոլոր դիակներն են ջրից դուրս բերվել:

Նշենք, որ կիրակի օրը հնդկական տաճարի մոտ հավաքվել էր շուրջ 50 հազար ուխտավոր` Հնդկաստանի գլխավոր կրոնական տոներից մեկը` Դուրգայի փառատոնը նշելու համար: