«Բերկուտը» լքում է Եվրամայդանը

Ուկրաինայի հատուկջոկատայինները սկսել են լքել Մայդանը: Ինչպես հաղորդում է ուկրաինական УНИАН գործակալությունը, «Բերկուտ» զինվորները հավաքված ցուցարարների բացականչությունների տակ սկսել են նստել ավտոբուսները:

Ընդդիմության ներկայացուցիչները հայտնել են, որ այս պահին Մայդանում գտնվում է 25 հազար մարդ:

Միաժամանակ, ներքին զորքերի զինվորներն իրենց դիրքերը թողել են նաև Կրեշչատիկում և շարժվել Պուշկինի փողոցի ուղղությամբ: Այնտեղ գտնվող ցուցարարները սկսել են վերականգնել գիշերը հանված բարիկադները:

Ուկրաինայի ներքին գործերի նախարար Վիտալի Զախարչենկոն հայտարարել է, որ Եվրամայդանում ուժով ցուցարարներին չեն ցրի: Նա ընդգծել է, որ իշխանությունները հարգում են խաղաղ ցույցեր անցկացնելու ուկրաինացիների իրավունքը:

Հիշեցնենք, դեկտեմբերի 11-ի գիշերը «Բերկուտի» ուժայինները գործողություն են իրականացրել՝ ցուցարարներին ցրելու համար: Զանգվածային բախումից հաջողվել է խուսափել, այնուամենայնիվ, երկու կողմերից էլ կան վիրավորներ: