Ռուսաստանը Իսկանդեր հրթիռային համակարգ է տեղադրել ԵՄ հետ սահմանին. Bild

Ռուսաստանը «Искандер-М» տեսակի օպերատիվ-տակտիկական հրթիռային համակարգեր է տեղադրել Եվրամիության հետ սահմանին: Այս մասին գրում է Das Bild գերմանական պարբերականը` հղում կատարելով իրավապահ մարմիններում իր գաղտնի աղբյուրներին: Այս տեղեկության պաշտոնական հաստատում կամ ռուսական կողմից այս կապակցությամբ որևէ մեկնաբանություն չի հնչել: 

Պարբերականի տեղեկություններով` արբանյակային լուսանկարներում երևում են երկնիշ թվաքանակով հրթիռային համակարգեր, որոնք տեղակայված են Կալինինգրադում, ինչպես նաև Էստոնիայի, Լատվիայի և Լիտվայի հետ սահմանին: 

Իսկանդեր հրթիռային համակարգերը կարող են հագեցած լինել ինչպես սովորական, այնպես  էլ միջուկային սպառազինություններով և ոնակ են ոչնչացնել թիրախը 500 կմ հեռավորության վրա: Իսկ դա նշանակում է, որ դրանք հասնում են Լեհաստանի տարածք, և ենթադրաբար, կարող են հասնել անգամ Բեռլին, որը 527 կմ հեռավորության վրա է գտնվում, գրում է պարբերականը: 

Թերթի տեղեկություններով` «Искандер-М» հրթիռյաին համակարգը Կալինինգրադում տեղակայվել է վերջին 12 ամսիների ընթացքում: Թե երբ են արվել այդ լուսանկարները, չի հաղորդվում: