Գերմանիայի ու ԱՄՆ-ի միջև հակալրտեսական համաձայնագիրը տապալման շեմին է. ԶԼՄ-ներ

Ինչպես հայտնում է itar-tass-ը, Գերմանիայի և ԱՄՆ-ի միջև իրականացվող լրտեսական գործունեությունը վերացնելու երկկողմ համաձայնագրի ստորագրումը տապալման շեմին է գտնվում: Այս մասին տեղեկացնում է Süddeutsche Zeitung պարբերականը:

Չնայած այն բանին, որ երկխոսությունը պաշտոնապես դեռ ընթացքի մեջ է, Գերմանիայի կառավարությունն այլևս հույս չունի, որ կստորագրվի նախատեսված պայմանագիրը: ԱՄՆ-ն հրաժարվում է տալ համաձայնություն այն մասին, որ ապագայում չի շարունակի լրտեսել գերմանական կառավարության անդամներին:

Ամերիկյան հատուկ ծառայությունները մտադիր չեն բացահայտել այն տեղեկատվությունը, թե երբ են սկսել գաղտնալսել Գերմանիայի կանցլեր Անգելա Մերկելի բջջային հեռախոսը:

«Մեզ մոտ ոչինչ չի ստացվի»,-Sueddeutsche Zeitung պարբերականին տված հարցազրույցում ասել է Գերմանիայի դաշնային հետախուզական ծառայության ներկայացուցիչը:

Հիշեցնենք, որ  ԱՄՆ-ի և Գերմանիայի հարաբերությունները լարվել էին հերթական լրտեսական սկանդալի պատճառով, երբ տեղեկություն տարածվեց, որ ամերիկյան հատուկ ծառայությունները գաղտնալսել են Գերմանիայի կանցլեր Անգելա Մերկելի հեռախոսազանգերը: