Լիբիացի աշխարհազորայինները կսկսեն իրականացնել նավթի արտահանում

Ինչպես հայտնում է itar-tass-ը, լիբիացի աշխարհազորայինները, որոնք 2013 թվականի հուլիսից արգելափակել են Լիբիայի նավթային նավահանգիստները և իրենց տրամադրության տակ ունեն մոտ 23.000 զինյալ, մտադիր են մոտ ժամանակներս ինքնուրույն սկսել «սև ոսկու» արտահանում: Այս մասին հայտարարել է Կիրենաիկայի ինքնահռչակ ինքնավարության քաղաքական բյուրոյի ղեկավար Իբրահիմ ալ-Ջատրանը:

«Մենք ունենք մոտ 23.000 մարտիկ, ռազմածովային ուժեր, բանակ, և որպեսզի նրանց աշխատավարձը բնականոն հունով կարողանանք վճարել, մենք պետք է մոտ ապագայում սկսենք նավթի արտահանումը»,-ասել է ալ-Ջատրանը:

Ալ-Ջատրանը չի հայտնել, թե կոնկրետ որ երկրներին կամ ընկերություններին են ծրագրում վաճառել նավթ:

Հիշեցնենք, որ ապստամբական ջոկատները նախորդ տարվա հուլիսից խոչընդոտում են Լիբիայի նավթային ոլորտի աշխատանքները, ինչի հետևանքով «սև ոսկու» արտահանումն օրական 1.5 միլիոն բարելից նվազել է մինչև 250.000 բարելի: