Facebook-ը 10-ամյակը նշում է աշխարհի խոշորագույն սոցցանցի կարգավիճակում

Facebook ընկերությունը նշում է գործարկման օրվանից անցած տասը տարին. այդ ընթացքում նրան հաջողվել է հասնել աշխարհի խոշորագույն սոցիալական օնլայն ռեսուրսի կարգավիճակին՝ ամսական 1,23 միլիարդ օգտատերերի լսարանով: Այս մասին գրում է Digit.ru-ն:

Facebook-ի ղեկավար Մարկ Ցուկերբերգը սոցցանցն ստեղծել էր որպես բացառապես Հարվարդի համալսարանի ուսանողների շփման համար նախատեսված կայք, սակայն շուտով դրա առավելությունները գնահատեցին նախ ԱՄՆ-ի մյուս բուհերի ուսանողները, այնուհետև դպրոցականները, իսկ ապա նաև օգտատերեր ամբողջ աշխարհից:

Տասը տարում Facebook-ի օգտատերերը հաստատել են ավելի քան 200 միլիարդ բարեկամական կապեր: 2009 թվականին Facebook-ը սոցիալական ցանցերից առաջինն էր, որ գործարկեց Like կոճակը. այժմ օգտատերերն այն սեղմում են օրական 6 միլիարդ անգամ: Ցուկերբերգն սկզբում չէր ցանկանում, որ Facebook-ում լինի լուսանկարների փոխանակման հնարավորություն, սակայն 2005 թվականի հոկտեմբերին գործառույթի գործարկման պահից ի վեր օգտատերերը սոցցանցում զետեղել են ավելի քան 400 միլիարդ լուսանկար: Բացի դրանից, միայն վերջին երկու տարում Facebook-ի օգտատերերը 7,8 տրիլիոն հաղորդագրություններ են փոխանակել կայքում:

Facebook-ի շարժական ծառայությունների օգտատերերի թիվը մոտենում է մեկ միլիարդին, իսկ շարժական գովազդը սոցցանցին բերել է 3,15 միլիարդ դոլար կամ 2013 թվականի ամբողջ հասույթի 40 տոկոսը: Facebook-ը հաջորդ տասնամյակ է մտնում 11,5 միլիարդ դոլար կանխիկ դրամով և Internet.org հավակնոտ ծրագրով, որի շրջանակներում ցանկանում է վերացնել համացանցին մարդկանց միանալու բոլոր արգելքները:

Facebook.com-ի լսարանը սրընթաց աճում է: Ամեն օր հայտնվում են 140 նոր օգտատերեր: 2008 թվականին այցելուների թիվը հասել է 90 միլիոնի, ինչն այն դարձրել է աշխարհի խոշորագույն սոցիալական ցանցը: