ԱՄՆ-ն Յանուկովիչից պահանջում է ամեն ինչ անել երկրում լարվածությունը թուլացնելու համար

Ինչպես հայտնում է itar-tass-ը, ԱՄՆ-ն այն կարծիքին է, որ նախագահ Վիկտոր Յանուկովիչը պետք է օգտագործի բոլոր հնարավորությունները, ներառյալ Կիևին միջազգային ֆինանսական օգնություն ցուցաբերելու առաջարկները, որպեսզի թուլացնի երկրում տիրող լարվածությունը: Այդ մասին ասված է Սպիտակ տան հայտարարության մեջ, որը տարածվել է Ուկրաինայի նախագահի և ԱՄՆ-ի փոխնախագահ Ջոզեֆ Բայդենի միջև փետրվարի 4-ին կայացած հերթական հեռախոսազրույցի արդյունքների վերաբերյալ:

Զրույցի ընթացքում Բայդենն ընդգծել է, որ Ուկրաինայում խաղաղության և կայունության հասնելու միակ իրական ճանապարհը երկխոսության շարունակումն է և իսկական փոխզիջման հասնելը նոր կառավարության ձևավորման նպատակով, որը կկարողանա նվաճել ուկրաինացի ժողովրդի վստահությունը:

Հիշեցնենք, որ փետրվարի 4-ին՝ Գերագույն ռադայի նիստի ընդմիջմանը, Կլիչկոն հանդիպում է անցկացրել Ուկրաինայի նախագահ Վիկտոր Յանուկովիչի հետ, որի ընթացքում քննարկվել է հանրապետության 2004 թվականի Սահմանադրությանը վերադառնալու հարցը: