Եվրախորհրդարանը պատժում է իր «ալիևամետ» 7 պատգամավորին

Եվրախորհրդարանի խորհրդակցական կոմիտեն փետրվարի 11-ին կքննարկի իր 7 պատգամավորի հարցը, ովքեր դիտորդական առաքելությունների կազմում հետեւել են անցյալ հոկտեմբերին Ադրբեջանում անցկացված նախագահական ընտրություններին եւ կայացած ընտրությունները ճանաչել արդարացի ու ժողովրդավարական: Խորհրդակցական կոմիտեն էթիկայի հարցեր քննարկող յուրատեսակ խորհրդարանական հանձնաժողով է:

Virtualaz.org-ը հայտնում է, որ Եվրախորհրդարանի գոյության ամբողջ պատմության ընթացքում եվրոպացի պատգամավորները պատրաստվում են պատժամիջոցներ ընդունել իրենց գործընկերների նկատմամբ, ովքեր անբարեխիղճ գործողություններ են կատարել: Կոմիտեն եվրախորհրդարանականներին մեղադրում է Ադրբեջանում ընտրությունների բացասական արդյունքները թաքցնելու դիմաց կաշառք եւ թանկարժեք նվերներ ստանալու համար: Կոմիտեն պետք է քննարկի նաեւ ֆրանսիացի պատգամավոր , Եվրախորհրդարանի էներգետիկայի հարցերով հանձնաժողովի անդամ Ռաշիդա Դաթիի գործողությունները, ով հայտնի է որպես ադրբեջանական կառավարության գլխավոր լոբբիստներից մեկը:

Խպասվում է, որ Եվրախորհրդարանը վաղը պատժամիջոցներ կընդունի պատգամավորներ, Ադրբեջանում դիտորդական առաքելության ղեկավար Պիտեր Առլակիի, Ֆիլիպ Կաչմարեկի, Յոահիմ Ցելերայի, Եվգենիա Կիրիլովայի, Նորիկի Նիկոլայի, Գաբրոչա եւ Ֆիորելլո Պչովելարաների նկատմամբ:

Իր գնահատականներում Եվրախորհրդարանը հիմնվում է ԵԱՀԿ ժողովրդավարական հաստատությունների եւ Մարդու իրավունքների գրասենյակի եզրափակիչ գնահատականի վրա, որը հակասում է Եվրախորհրդարանի դիտորդական առաքելության դիրքորոշմանը: Պատգամավորներին մեղադրում են Բաքվում կաշառք ստանալու համար:

Եվրախորհրդարանի նոր կարգապահական վարքականոնն ընդունվել է անցյալ տարվա հուլիսին: Այդ փաստաթղթի համաձայն` Եվրախորհրդարանի պատգամավորներն իրենց պաշտոնական վեբ-էջերում պետք է հայտնեն նվեր ստանալու մասին յուրաքանչյուր տեղեկություն: Ավելին, վարքականոններն արգելում են 150 եվրոյից ավելի արժողությամբ նվերներ ընդունել: Մինչ այժմ Խորհրդակցական կոմիտեն պատժել է միայն մեկ պատգամավորի` բելգիացի Ժան Լյուկ Դեանին' իր եկամուտների մասին հայտարարագիրը կեղծելու համար:

Վարքականոն դրույթների համաձայն' պատգամավորին նկատողություն է հայտարարվում Եվրախորհրդարանի նախագահի անունից, իսկ նկատողությունից հետո կարող են կիրառվել նաեւ ֆինանսական պատժամիջոցներ:

Ադրբեջանում տեղի ունեցած նախագահական ընտրությունները խստորեն քննադատել, անազատ եւ անարդար, եւ միջազգային չափանիշներին չհամապատասխանող են բնութագրել ԵԱՀԿ ժողովրդավարական հաստատությունների եւ մարդու իրավունքների գրասենյակը, Եվրախորհրդարանը, ԱՄՆ պետքարտուղարությունը, Ամերիկայի Հելսինկյան հանձնաժողովը, Եվրամիության արտաքին քաղաքականության հարցերով հանձնակատար Քեթրին Էշթոնը, ԵՄ ընդլյանման եւ հարեւանության քաղաքականության հարցերով հանձնակատար Շտեֆան Ֆյուլեն, Մեծ Բրիտանիայի ԱԳՆ-ն, Freedom House միջազգային իրավապաշտպան կազմակերպությունը, Բաքվում ԱՄՆ նախկին դեսպան Ռիչարդ Կոզլարիչը, Ադրբեջանի Democracy lerning հասարակական միավորումը եւ Ադրբեջանի ընտրությունների մոնիտորինգի եւ ժողովրդավարության ուսուցման կենտրոնը: