Մանկապիղծների նկատմամբ ստերջացման կիրառության հնարավորությունը

Նոյեմբերի 1-ին տեղի կունենա հանդիպում – քննարկում, որը կազմակերպել է «Կանանց ռեսուրսային կենտրոն» ՀԿ-ն եւ որի թեման կլինի «Մանկապիղծների նկատմամբ որպես հարկադրանքի միջոց քիմիական եղանակով ստերջացման կիրառության հնարավորությունը կամ անհնարինությունը»:

Ինչպես նշված է «Կանանց ռեսուրսային կենտրոն»-ից ստացված հաղորդագրության մեջ, ՀՀ Ազգային ժողովի քննարկմանը ներկայացվել է ՀՀ Քրեական օրենսգրքում փոփոխություն կատարելու օրենքի նախագիծ, որը վերաբերվում է օրենսգրքի 15-րդ գլխում նախատեսված բժշկական բնույթի հարկադրանքի միջոցների շարքը նոր միջոցով «քիմիական եղանակով ստերջացում» համալրմանը: Նախագծով կարգավորվում է ստերջացման ենթակա անձանց շրջանակը, ինչպես նաեւ ստերջացման իրականացման կարգը: Քիմիական եղանակով ստերջացումը կիրառվում է եվրոպական մի շարք երկրներում /Գերմանիա, Շվեդիա,Դանիա, Միացյալ Թագավորություն, Չեխիա եւ այլն/, Կանադայում, ԱՄՆ-ում, ՌԴ-ում այժմ նույնպես ներկայացվել է քիմիական եղանակով ստերջացմանը վերաբերող օրենքի նախագիծ:

Հանդիպման նպատակն է քննարկել, թե որքանով է ՀՀ-ում հնարավոր մանկապիղծների նկատմամբ որպես հարկադրանքի միջոց կիրառել քիմիական եղանակով ստերջացում, որքանով են այս դեպքում պաշտպանված մարդու իրավունքները եւ այլ կարեւոր հարցեր:

Հանդիպմանը հրավիրված են ներկայացուցիչներ Ազգային Ժողովի պետական – իրավական հարցերի մշտական հանձնաժողովից, միջազգային եւ տեղական կազմակերպություններից: