Հրայր Թովմասյան. «Իրականացվող բարեփոխումները նպաստավոր պայմաններ կստեղծեն, որպեսզի Հայաստանը մոտ ապագայում նորից ընդգրկվի «հազարամյակի մարտահրավերներ» ծրագրում»

Այս մասին է խոսել ՀՀ արդարադատության նախարար Հրայր Թովմասյանն ԱՄՆ նորանշանակ դեսպան Ջոն Ա. Հեֆերնի հետ հանդիպման ժամանակ:
Ողջունելով հյուրին` նախարարը շնորհավորել է պատասխանատու պաշտոնում նշանակվելու կապացությամբ, շեշտելով, որ նման փորձառու դիվանագետի նշանակումը վկայում է, թե ինչ կարևոր նշանակություն ունի ԱՄՆ կառավարության համար Հայաստանի հանրապետությունը:
Նախարար Թովմասյանը բարձր գնահատելով հայ-ամերիկյան հարաբերությունները` հույս հայտնեց, որ լավ հիմքերով ստեղծված համագործակցությունը հետագայում էլ ավելի արդյունավետ կդառնա:
Հյուրի խնդրանքով Հրայր Թովմասյանը ներկայացրեց հանրապետությունում, ինչպես նաև արդարադատության նախարարության համակարգում իրականացվող և նախատեսվող բարեփոխումների հիմնական ուղղություններն ու փիլիսոփայությունը` «հնարավորինս փոքրացնել քաղաքացի պետություն շփումները, պարզեցնել ընթացակարգերը, ինչը կհանգեցնի կոռուպցիոն ռիսկերի նվազեցմանը»: Նախարարն առանձնացրեց կատարված մի շարք փոփոխություններ, որոնք արդեն արդյունք են տվել: Վստահություն հայտնեց նաև , որ իրականացվող բարեփոխումները նպաստավոր պայմաններ կստեղծեն, որպեսզի Հայաստանը մոտ ապագայում նորից ընդգրկվի «հազարամյակի մարտահրավերներ» ծրագրում:
Դեսպան Ջոն Ա. Հեֆերնը, շնորհակալություն հայտնելով ընդունելության համար, վստահեցրեց, որ կշարունակի իր նախորդի` դեսպան Մարի Յովանովիչի կատարած աշխատանքը՝ նպաստելով հայ-ամերիկյան հարաբերությունների խորացմանն ու զարգացմանը: