Թմրանյութի և զենք-զինամթերքի հայտնաբերման երեք դեպք է գրանցվել

Նոյեմբերի 1-ին, ժամը 10.10-ին, ոստիկանության Երևան քաղաքի վարչության հերթապահ մաս է զանգահարել մի քաղաքացի և հայտնել, որ Նանսենի փողոցի թիվ 16 շենքի մոտ գտնվող աղբարկղի մոտ զենք-զինամթերք է թողնում:

Մեկնած օպերատիվ խումբը նշված վայրում հայտնաբերել է որսորդական հրացան, «Ֆ-1» տիպի 1 նռնակ' կոռոզիայի ենթարկված պայթուցիչով, 1 ուսումնական նռնակ և «ԱԿ» ինքնաձիգի 121 փամփուշտ:

Նույն օրը երեկոյան, ժամը 21.30-ին, ոստիկանության Երևան քաղաքի վարչության հերթապահ մաս է զանգահարել մեկ այլ քաղաքացի և հայտնել, որ Լենինգրադյան փողոցից դեպի Նոյ թաղամաս տանող ճանապարհին գտնվող կիսակառույց շենքում ինքնաձիգ և փամփուշտներ է թողնում:

Մեկնած օպերատիվ խումբը նշված վայրում հայտնաբերել է «ԱԿՄ» ինքնաձիգ' դատարկ պահունակով, 2 նռնակ' առանց պայթուցիչների, տարբեր տրամաչափի 145 փամփուշտ և 2 պայթուցիչ:

Հայտնաբերված զենք-զինամթերքն ուղարկվել է փորձաքննության:

Կատարվում է հետաքննություն:

Նոյեմբերի 1-ին, ժամը 21.00-ին, ոստիկանության Արմավիրի բաժնի ծառայողները, թմրամիջոց պահելու կասկածանքով, Արազափ գյուղից բերման են ենթարկել 42-ամյա մի տղամարդու, որի մոտ հայտնաբերվել է 11,9 գրամ կանեփանման զանգված: բերման ենթարկվածը հայտարարել է, որ թմրամիջոցը պատրաստել է իր օգտագործման համար:

Հայտնաբերվածն ուղարկվել է փորձաքննության: