Մոսկվան կոչ է արել երկխոսություն հաստատել Դոնբասի և Կիևի ներկայացուցիչների միջև

Ռուսաստանի արտաքին գործերի նախարարությունը կոչ է արել ակտիվ քայլեր ձեռնարկել Մինսկի պայմանավորվածությունների շրջանակներում Կիևի և Դոնբասի ներկայացուցիչների միջև երկխոսություն հաստատելու համար:

«Հաշվի առնելով կայացած ընտրությունները՝ խիստ կարևոր է ակտիվ քայլեր ձեռնարկել Ուկրաինայի կենտրոնական իշխանությունների և Դոնբասի ներկայացուցիչների միջև կայուն երկխոսություն հաստատելու համար՝ Մինսկում ձեռք բերված համաձայնությունների հունով»,-ասված է ՌԴ ԱԳ նախարարության կայքում զետեղված հայտարարության մեջ:

«Պատրաստ ենք մեր միջազգային գործընկերների հետ միասին այսուհետև էլ կառուցողականորեն աջակցել Ուկրաինայի ճգնաժամային իրադրության կարգավորմանը»,- ընդգծվում է հաղորդագրության մեջ:

Մինչդեռ ՄԱԿ-ի գլխավոր քարտուղար Պան Գի Մունն այն կարծիքին է, որ Դոնեցկի և Լուգանսկի ինքնահռչակ ժողովրդական հանրապետություններում նոյեմբերի 2-ին անցկացված ընտրությունները Մինսկի պայմանավորվածությունների լուրջ խախտում են: Ինչպես հայտնել է նրա պաշտոնական ներկայացուցչի տեղակալ Ֆարխան Հակը, անցկացված ընտրությունները չեն նպաստի Ուկրաինայի արևելքում հակամարտության խաղաղ կարգավորմանը:

ԴԺՀ-ի ղեկավարի և պատգամավորների ընտրություններում առաջատարը Ինքնահռչակ Հանրապետության վարչապետ Ալեքսանդր Զախարչենկոն է և նրա գլխավորած «Դոնեցկի Հանրապետություն» շարժումը: ԼԺՀ-ի ընտրություններում հաղթում է ինքնահռչակ հանրապետության գործող առաջնորդ Իգոր Պլոտնիցկին և «Խաղաղություն Լուգանշչինայում» հասարակական կազմակերպությունը, որի ցուցակը նա գլխավորում է:

Կիևում հայտարարում են ինքնահռչակ ժողովրդական հանրապետություններում ընտրությունների անցկացման անօրինականության մասին, քանի որ, Ուկրաինայի իշխանությունների կարծիքով, այդ քվեարկությունը հակասում է Մինսկի պայմանավորվածություններին: Այդ դիրքորոշմանն աջակցում է Արևմուտքը, հաղորդել է ՌԻԱ Նովոստին: