Իրաքյան ուժերը ԻՊ-ի տասնյակ անդամների են ոչնչացրել

Իրաքի տեղեկատվական աղբյուրները հայտնել են, որ երկրի անվտանգության ուժերը 24 ժամվա ընթացքում մայրաքաղաք Բաղդադի արևմուտքում ազատել են Շաաբ շրջանում առևանգվածներին, ոչնչացրել են 4 ահաբեկչի, ինչպես նաև նրանց պատկանող 2 մեքենա:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, Սալահ ադ Դին մարզի Բայջի քաղաքում սպանվել է «Իսլամական պետության» 3 դիպուկահար: Անվտանգության ուժերը Բայջիի Մասաֆի թաղամասը մաքրել են ԻՊ-ի անդամներից: Մյուս կողմից' օդային ուժերը ռմբակոծել են Թիրքիթ քաղաքի հարավային հատվածները ԻՊ-ի դիրքերի ուղղությամբ:

Ներքին գործերի նախարարության տեղեկություններով, Իրաքի արևմուտքում գտնվող Կաիմ քաղաքում օդային ռմբակոծության հետևանքով ԻՊ-ի 25 անդամ է սպանվել, ավելի քան 20-ը վիրավորվել են:

Բաղդադում նոյեմբերի 2-ին պայթյունների հետևանքով 19 մարդ զոհվել, ևս 569-ը վիրավորվել է: Պայթյուններից մեկը տեղի է ունեցել Բաղդադի Իալամ թաղամասում, որի հետևանքով 13 մարդ է զոհվել: Մյուս պայթյունը որոտացել է Բաղդադի կենտրոնում՝ խլելով 5 մարդու կյանք: Երրորդ պայթյունը տեղի է ունեցել Սինաա թաղամասում, որից զոհվել է 1 և վիրավորվել 5 մարդ:

ՄԱԿ-ը հայտարարել է, որ հոկտեմբեր ամսին Իրաքում բռնությունների զոհ է դարձել 1273, և վիրավորվել 2010 մարդ: Զոհերից 417-ը՝ իրաքյան բանակի և քրդական ուժերի անդամներ են, 856-ը խաղաղ քաղաքացիներ, որոնց թվում' ոստիկանության 139 աշխատակից: